«Ешем – поянлыкем» конкурсыш пурышо паша
Ачам Геннадий Алексеевич Конаков школышто биологий ден химийым шуко ий туныктен. Оҥай пӱртӱс кончышым войзен, изирак альбомымат ыштен. Шонанпыл фотож дене ик конкурсышто сеҥышыш лектын ыле. Ме тудын дене пырля «Йошкар книгаш» пурышо лывым, кушкылым муын, атласыште лӱмыштым кычалынна.
Тыгак ачам марий поэзийым йӧрата. Йӧратыме поэтше – Альберт Васильев. Марий концертышкат куанен коштеш, Володя Матвеевын мурымыжо чонжылан лишыл. Ялышке мийымем годым ачам дене кызытсе поэзий, прозо нерген мутланена, ача-авам дене сылнымут касым эртарена.
Авам Надежда Сергеевна Конакова (Чендемерова) Шернур район Эшполдин ден Купсола школлаште икшыве-влакым руш йылме ден литературлан 29 ий шӱмаҥден. Тений авам тукымвож пушеҥгым сӱретлен да «Чендемеровмыт тукым» изирак шымлымашыжым родо-влаклан пӧлеклен. Яра жапше годым пидаш йӧрата.
Мемнан ешыште поснак жаплыме пайрем – тиде Шахмат кече (20 июль). Ачам ден авам шахмат дене модын палыме лийыныт. Авам Всероссийский Телымсе ялысе спорт модмашыштат республикнан чапшым арален: 2005 ийыште – Курганыште, 2007 ийыште – Омскышто, 2009 ийыште – Ханты-Мансийск олаште. Коча-ковам ончен, Даниил уныкаштат шахмат дене модаш кумылаҥын да «Шахматы» почеламутым серен, тений Марий Элысе Писатель ушемын эртарыме «Сылнымут алмаштыш» регион-влак кокласе молодёжный сылнымут конкурсышто шке таҥаш-влак коклаште 1-ше верым налын.
Кочам Алексей Ильич Конаков (ачамын ачаже) Кугу Отечественный сарын йӱштӧ-шокшыжым чытен лектын, селькор лийын. Кочам нерген возымо «Шкетанлан серышым возен» статьям «Кугарня» газетын савыктен лукмо «Шучко сар огеш мондалт» книгашке пурен. Ковам Анна Фёдоровна Уралышке чодыра руаш коштын.
Вес ковам Евдокия Максимовна Чендемерова (авамын аваже) сар годым тылыште тыршен, презым ончен. Тӱрлӧ тутло сийым ямдылаш кумылан ыле. Вич икшывыжге марий газетым лудаш йӧратат, кок йочаже туныктышо лийын.
Кочам Сергей Степанович Чендемеров колхоз председательлан тыршен. Изаже Василий Степанович Кукнур школышто марий йылме ден литературым туныктен, «Марий АССР-ын сулло туныктышыжо» лӱм дене палемдалтын.
Кызыт ачам ден авам сулен налме канышыште улыт, пӱртӱсыш лектын коштыт, вольыкымат ашнат. Шахмат таҥасымашкат миен толыт.
Еш – илышын рӱдыжӧ. Калыкын виян, икоян улмыжат еш гыч тӱҥалеш.
Светлана Муртазина (Конакова).
Медведево район, Руэм.