22 ноябрьыште Светлана Сандакова «Бавай» спектакль дене бенефисым эртара.
Чыладам пагален ӱжеш.
Марий Элын калык артисткыже Светлана Сандакова (Ягулбаева) – таче марий тӱняште палыме еҥ, М.Шкетан лӱмеш Марий драмтеатрын актрисыже, шыма йӱкан мурызо, кум шочшан ава. 26 ий тудо марий калыкын эн тӱҥ театрыштыже пашам ышта. Ты жапыште 59 роль чоҥалтын.
Куштызо огыл, а артист
Морко район Шеҥше селан ӱдыржӧ тӱҥалтыште артист огыл, а куштызо лияш шонен. Но культпросветучилищын (кызыт И.Палантай лӱмеш тӱвыра ден сымыктыш колледж) хореографий пӧлкашкыже пурен кертын огыл. Тыге ик жап гыч тудо режиссёр О.Г.Иркабаевын вуйлатыме курсыштыжо артистлан тунемаш тӱҥалын. Тыгодымак Светлана Марий самырык театрыште кок ий наре тӱрлӧ рольым модын. «Пӧртыл, ӱдырем» (Г.Гордеев) постановкышто Олян образшым устан чоҥен. А вара Москошко М.Щепкин лӱмеш кӱшыл театральный училищыш еҥ кӱлешым пален налмеке, Олег Геннадьевич тудым рӱдолашке ужатен да каласен: «Мый Москош кайыметлан моткоч чот куанем. Но, вес могырым, театр гыч нигуш колтымем ок шу». Тыге Светлана вигак кокымшо курсыш тунемаш куснен да Роман Алексеев, Светлана Строганова, Алина Егошина, моло дене пырля 1998 ийыште диплом дене Йошкар-Олаш пӧртылын.
Такшым Моско деч вара ӱдыр уэш Марий самырык театрыш пашаш каяш шонен. Вет тушто тудым вученыт, йӧратеныт, рольжат лийын, зрительжат. Но… Эн ондак Моско гыч кондымо диплом спектакльлаште модаш кӱлын, вара роль почеш рольым ӱшаненыт. Тыге М.Шкетан лӱмеш театрешак кодын. А ынде тудым кокымшо пӧртшылан шотла.
Нигуштыжат модаш неле огыл
Светлана тӱрлӧ спектакльыште модеш: лирике сынаныштат, драмыштат, комедийыштат. Чылаштыжат геройын образшым келгын почын пуа. «Мыланем нигуштыжат модаш неле огыл. Тунемме годымат актёр профессийыште нелылыкым пешыже шижын омыл. Лач гуманитарный предмет-влакым ом йӧрате ыле: философийым, литературым. Кызытат образым чоҥымо годым йӧсым пеш ом шиж: тыге модын ончем, туге – вара шканем келшыше образым муам. Характерный роль утларак келша. Тушто шкем тӱрлӧ могырым ончыкташ лиеш. А лирическийыште шкем изишак кучыман, тыматлырак лийман», – ойла актрисе. А характерный рольлан тудо чынжымак поян. Тиде «Салика» спектакльыште – Марина да Эчан вате, «Ачийжат-авийжат» постановкышто – Орина, Ведасий, «Окса тул» спектакльыште – Мужедше кува да молат.
«Ондак рольым тунемаш куштылгырак ыле. Кызыт тидлан жап шукырак кая», – ойла актрисе. Тудо корныштат, мӧҥгыштӧ сомылым ыштыме годымат эре рольым тунемеш. Яра жап лектеш гын, вигак роль кагазшым кучен шинчеш. Тевыс тыгай артистын пӱрымашыже. Куштылго манын ида шоно!
Но спектакль эртымеке, Светланан чонжо эрежак огеш лушко. Тудо южгунам шкенжым шке критиковатла, мом удан модын, можо лектын огыл, анализым ышта. Постановко деч вара утларакшым Алёша пелашыж (М.Шкетан лӱмеш театрын актёржо Алексей Сандаков) дене коктын модмо роль нерген кутырат, мо келшен огыл – вашла ойлат. Икманаш, икте-весылан полшаш тыршат. «Южгунам модмем огеш келше. Тунам шкемым шке вурсем: «Тыге ок лий. Тыршаш кӱлеш, кычалаш. Шканемат огеш келше гын, ончышылан кузе келшышаш?» – манеш Марий Элын калык артисткыже.
Кум шочшан ава
Светлана тыгак – йӧратыме ӱдыр, поро кумылан, но тыгодымак пеҥгыдын йодын моштышо ава да ӱшанле пелаш. Тудо ава-ачажын, Галина Васильевна ден Виктор Никодимович Ягулбаевмытын, ик йоча гына кушкын. Тыге йокрокын чучын, садлан шке семынже шуко шочшан ава лияш шонен. Юмо тудын шонымашыжым колын, витне. Таче ешыште кум йоча кушкеш: Валерия ынде кугу ӱдыр лийын шогалын, Элавий 10-шо классыш, Аксар 3-шо классыш коштыт.
Марий Элын калык артисткыже Светлана Сандакова ден Алексей пелашыже Москошто М.Щепкин лӱмеш кӱшыл театральный училищым пырля тунем лектыныт. Вашла ик шинчаончалтыш гычак умылат. Ятыр жап оласе пачерыште илыме деч вара ола воктене пӧртым чоҥен шогалтеныт. Сад-пакчашт чоным куандара. Светлана тӱрлӧ мотор пеледышым кушта. «Пакчаштем чон кана», – ойла ӱдырамаш.
Индийым ужшаш ыле
Кажне айдемын илышыштыже шонымашыже-влак улыт. Светланан ятырже шукталтын. Но йоча годсо ик шонымашыже эше уке. Тудлан Индий кино-влак келшеныт. Кузе ок келше: тушто тыгай йӧратымаш, мотор муро-влак, сем. Тунамак кунам гынат Индийыш миен толам манын, шканже мутым пуэн. Эсогыл тукым шӱжарже дене тидын шотышто ӱчашеныт. Миен толамак гын, тый мылам тӱрлӧ чиян телевизорым налын пуэт (1990 ийла тӱҥалтыште тыгай телевизор омышто веле койын) манын тунам Светлана шӱжаржылан. Но ты шонымаш але шукталтын огыл, тукым шӱжаржат, жал, илыш гыч каен колтен. А шонымаш ила.
Светлана моло деч эн ончычак шӧртньӧ тӱсан ӱпшӧ дене ойыртемалтеш. Тыгай шагал еҥын уло. Изиж годым тыгай тӱс тудлан шуко тургыжланымашым (меат эре ала-молан дыр иктым-весым рыжий-рыжий, конопатый…. манын куржталыштына ыле) конден гынат, кызыт мотор ӱпан улмыжлан куана веле. Да илышым моткоч йӧрата. Тудын кажне татшылан куана.
С.Сандакован альбомжо гыч налме фото-влак.