Эртыше кечылаште Йошкар-Олаште «Автоледи – 2025» конкурс кандашымше гана эртаралтын. 29 участник эн ончыч теорийым палымаште таҥасен: ӱдыр-влак корно правилым, ДТП годым икымше медполышым пуымаште шинчымашыштым тергеныт. А вара нуно машинам мастарын виктарен моштымыштым ончыктеныт. Чыла этапым иктешлымеке, эн сай автоледи лӱмым Диана Мосуновалан (фотошто -покшелне) пуымо.
Математикым йӧратыше
Диана – Медведево район Кӱшыл Озакъял гыч. Шке ялысе тӱҥалтыш школ деч вара Медведево посёлкысо гимназийыш куснен. Ӱдырлан эн чот математике келшен, садлан ты предмет дене олимпиадылашке ушнен, республикысе кӱкшытыштат ончыл верыш лектын.
Шке илышыжым математике дене кылдаш шонен, 11-ше класс деч вара МарГУ-со физике-математике факультетыш тунемаш пурен. Да дипломым налмекыжат, университетышкак пашаш кодын – ты факультетыштак студент-влакым туныкта. Математикым шинча йӱлен тунемше ӱдыр-рвезе-шамыч дене пашам ышташ поснак куанле манын палдара Диана Эдуардовна. Адакшым кужу кеҥеж отпускланат тудо моткоч куана. Тунам шочмо ялыштыже кана, аваж дене пырля чодыраш коштыт, велосипед дене кудалыштыт.
Ӱмаште – кокымшо, тений – икымше
Конкурсыш Диана ӱмаштат ушнен ыле. Но тунам кокымшо верым веле налын. Дианалан уло кӧ деч тунемаш: ешыштышт опытан водитель-влак улыт. Ачаже – кугу стажан водитель, Газель дене кудалыштеш. Изажат ачаж семынак Газель дене грузым шупшыкта. Ӱмаште конкурслан ямдылалтме годым тудо Диана дене пырля автодромышто кудалыштын, пайдале каҥашым пуэден.
– Тений конкурсыш йолташ ӱдыремлан эҥертыш семын ушненам, манаш лиеш – тудо шкетын участвоватлаш ӧрын да лӱдын. Кас еда корно правил билет-влакым решатленам, автодромыштат ямдылалтынам. Трассыште икымше кудалышташ поснак тургыжланенам. Адакшым йолташ ӱдырем да эше икмыняр участнице дене ПДД-м палыме да икымше медполышым пуымо дене икнаре баллым погенна, садлан уэш ты этапым эрташ логалын, – каласкала Д.Мосунова.
Шӧртньӧ медальлан – у машина
Машинам виктараш ӱдырым ачаже туныктен. Тӱҥалтыш класслаште тунемше йочам школыш кудалме корнышто ончыкыжо шынден да Газель рульым пӱтыраш пуэн. Вара Диана изаж дене пырля ял воктенысе пасушто изи машинам виктараш тунемын. А школым шӧртньӧ медаль дене тунем пытарымыжлан ача-аваже ӱдырыштлан пӧлекым ыштеныт – у «Лада Приорам» налын пуэныт.
– Тӱҥалтыште кудалышташ лӱдмашан ыле, садлан тоштырак «девятке» дене кудалыштынам. Корнышто оравамат вашталташ, чыгынен шогалше машинаште пургедашат логалын. А кызыт машинам куанен виктарем, кеч-кушко лӱдде кудалам.
Пӧръеҥ-влак, ӱдыр-ӱдырамаш-шамыч коклаштат сай водитель-влак улыт. Но ешыштына мый профессиональный водительлан пӧръеҥ-влакым шотлем. Мыланем нунын марте кушкаш да кушкаш! – ойла Диана.
Кызытеш Д.Мосунован водитель семын кудалме эн тора корныжо – Уфа олаш. Ик кеҥежым Чебоксарыш да Йошкар-Ола мучко Газель дене грузым шупшыктен – тидланат категорийже уло.
«Автоледи-2025» конкурсыш Диана сеҥаш шонен ушнен огыл. Иктаж кумшо лиям гынат – сай лектыш, шонен тудо. Садлан икымше верым налмыжлан ӧрын да моткоч куанен. Пӧлек шотеш тудлан шудым солаш триммерым кучыктеныт. Тидыже ялыште – пеш кӱлешан арвер манын палемдыш автоледи. Кӧ пала, ала вес ийынат Марий Элысе эн сай автоледин лӱмжӧ ок вашталт?
Д.Мосунован альбомжо гыч налме фото.