Вӱдшор тылзын 10-шо кечынже «Пошкудем» передачым (вӱдышыжӧ Людмила Фёдорова) ямдылыше-влак Морко кундемыште моткоч вучымо уна лийыч. Вашлиймаш Шӱргыял школышто эртыш.
Тӱҥ амал семын теве мом шотлыман. Элыштына 2023 ийым Туныктышо ден наставникын идалыкышт семын увертарыме. Тачысе кечын самырык тукымым ончыко виктараш пеш шуко вий-куат кӱлеш. Тыште наставникын рольжо кугу. Туныктышо илалше еҥым да самырык тукымым ушен шога. Тыгай пеҥгыде кыл эреак лийшаш, лач тыге веле калыкыште ваш умылымаш, икте-весым пагалымаш шӱлыш озаланаш тӱҥалеш.
Шӱргыял школна ий гыч ийыш шочмо йылмым вияҥден толаш тырша. Тидланже тунемшына-влак районышто да республикыште шке чолгалыкыштым ончыктенак шогат. Школышто «Марий сылнымут садвечыште» кружок шке сомылжым ынде ятыр ий шукта да у деч у сеҥымаш дене чаплана.
А «Рвезе тукым» йоча ушемна рӱдылан шотлалтеш. Дружиныште – 37 икшыве. «Дом без одиночества» проектын кышкарыштыже ялысе илалше еҥ-влак дене пеҥгыде кылым ыштен шогена. Тудын пайдажат кугу: коча-ковалан полшымо дене йоча пашалан шӱмаҥеш, кугeракым пагалаш тунемеш, иктаҥаш—влак коклаште лидер койышыжо ылыжеш.
Кораксола кундемыштына илалше еҥ ятыр, но тунемше-влакым шке суртышто вучышыжо ала-молан шагалрак. Садлан ме шукыж годым София Николаевна ден Александр Викторович Кирилловмыт деке куанен вашкена. Ты суртышто керек-кунамат поро кумыл озалана. Тале кидмастар-влак, оза ден озавате, уло суртыштым юзо тӱняшке савыреныт. Тушко пурымеке, йоча йыр улшо моторлыкым, кидпаша дене сӧрастарыме пӧрткӧргым куанен онча. Тыгак огыл мо ме самырык тукымым тӱнян моторлыкшым перегаш туныктена?
София Николаевна кидпаша ончержым эреак уэмден шога. Кызыт Кугече пайрем лӱмеш кидпаша-влакым ямдылен ыле. А Александр Викторовичын мозаикыже шукерте огыл «Изи памаш» районысо таҥасымаште сеҥыше радамыш логалын.
Мый «Пошкудем» передачын чолга пашаеҥже-влаклан таум ойлем. Тек ончыкшымат мландымбалнына марий шӱлыш озалана, марий передаче-влак канде экран гоч калыкын кумылжым нӧлтен шогат, а самырык тукым кугезе йылмын ямжым шке вӱршерже вошт колтен да илалше еҥ-влакым пагален кушкеш.
Елена Григорьева, Шӱргыял школын вожатыйже да марий йылмым туныктышыжо.
Снимкыште: Кирилловмыт ешым да Шӱргыял школын чолга тунемшыже Надежда Сергеевам канде экраныш лукташ ямдылалтме годым.