Шӱдыр-влак шижтарат

Фото: Freepik

Июль

Шорык. Икмыняр нелылык дене тӱкнеда, нуным сеҥаш вийым пыштыман, иктаж-кӧн полышыжлан эҥертеда гын, сайрак. Руль ончылно да корным вончымо годым тӱткӧ лийза.

Презе. Тылзе тура савыртышым сӧра. Тазалык нерген шоналтыман, поснак илалше-влаклан. Шкет улшо-шамыч лишыл еҥым вашлийын кертыт. Таҥан-влаклан сӱан нерген шоналташ темлалтеш.

Йыгыр. Тӱрлӧ событийлан поян тылзе вуча. Шуко мутланаш логалеш. Но тума тарванен, умылыдымаш лектын кертыт. Садлан пашаштат, мӧҥгыштат мом ойлымым шекланыман.

Рак. Ласка тылзым сӧра, но тидлан вийым пыштыман, поснак окса дене кылдалтше авантюрыш пурыман огыл. Улшо нелылыкым куштылгын кораҥдеда.

Лев. Ятыр тӱрлӧ шижмаш чондам авалта: куанашат логалеш, кумылат волен кертеш. Романтике шулышан вашлиймаш вуча.

Ӱдыр. Июльышто нелырак лиеш, чот нойымым шижыда. Еш ден паша коклаште ойыраш логалеш. Кеч-могай ошкылым ыштыме деч ончыч сайын шоналтыман, шке вийлан ӱшаныза.

Виса. Тӱрлӧ событийлан поян тылзе лийшаш. Илышыштыда вашталтыш вуча. Пӱрымашын палыжым шекланен моштыза, тиде йоҥылыш деч кораҥаш полша.

Скорпион. Илыш радамдам шотыш кондаш темлалтеш. Пашаштыда да личный илышыштыда вашталтыш лийын кертеш.

Пикшызе. Тӱрлӧ еҥ дене шуко мутланаш, ятыр йодышым решатлаш логалеш, но кеч-могай ситуацийыште шкендам кидыште кучен моштыман.

Ирказа. Окса чондайда пойдаралтеш, но тидлан шкаланат чот пашам ыштыман. Еҥ-влакын кумылыштым волташ ида тырше, поро лийза. Каналташ манын, путешествийыш миен толза.

Вӱд йоктарыше. Ятыр событий вуча, но эре куандарыше огыл. Сурт коклаште, документ дене ятыр сомылым ворандараш перна. Икмыняр пашалан вигак пижашат логалеш.

Кол. Тылзе ласкан эртышаш. Утларакше сурт коклаште да лишыл еҥ-влак дене жап эрта. Йолташ-влак дене пырля каналташ йӧн лектеш, нунак кенета лекше нелылыкым кораҥдаш полшат.