21 декабрьыште Волжский район Карай кыдалаш школышто марий йылмым да литературым, ИКН-ым туныктышо-влаклан «Современные образовательные технологии в этнокультурном образовании обучающихся» семинар эртаралтын. Тышке тиде да Звенигово районысо педагог-влак ушненыт.
Карай школышто тӱҥалтыш класслаште туныктышо-влак шочмо марий йылме дене пособийым ямдылат. Семинарыште нуно ты паша опыт дене палдареныт, моло вере шукталтше сомыл нерген колыштыныт. Туныктымо у йӧн-влак нерген школ директор Л.А.Сергеева каласкален.
Вич виш урок лийын. Нуно моткоч оҥайын эртаралтыныт. Кумшо классыште В.Дальын «Икияш кугыза» туштан йомакшым Карай школын туныктышыжо В.В.Емельянова почын ончыктен. Урокышто идалыкын пагытше йоча-шамычлан туштен каласалтын, сӱрет-влакын содержанийым почын пуаш полшымыштым лончылымо, доска воктенат оҥай пашам ыштыме. Тушто шонен моштымо йӧн, презентацийым, мутер пашам кучылтмо. Ты йомак йоча-влаклан идалыкын ныл пагытшым, тылзе ден арня лӱмым пален налаш полшен.
Эсмекляпляк школ гыч тӱҥалтыш класслам туныктышо Э.В.Яковлева Карай школышто 5-ше класслан ойлончо-влак теме дене урокышто шуко тӱрлӧ пашам эртарен. Доскаш мут-влакым возыктен, кычалыктен, йоча-влакым урокын темыжым шке пален налаш таратен. Тунемше-шамыч мужыр дене пашам ыштеныт, икте-весым тергеныт, тӱшка вашмутым пуэныт… Туныктышо йоча-влакым кумылаҥден моштен да шонен пыштыме цельышкыже шуын.
Ты школынак туныктышыжо Л.В.Максимова 9-ше классыште сложный предложений нерген умылтарен. Туныктышын мастарлыкшылан, чолгалыкшылан куаныман гына. Йоча-влаклан термин-влакым ойлаш да ушышко пышташ куштылго огыл, сандене тӱрлӧ йоным кучылташ логалеш.
Тылеч посна мастер-класс-влак лийыныт. ФГОС-ым шыҥдарыме жапыште шочмо йылме ден литератур уроклаште кызытсе туныктымо технологийым кучылтмо нерген шке паша опытшо дене Л.А.Сергеева палдарен. Тыгаяк тӱрлӧ йӧным кучылтмыж нерген Карай школышто тӱҥалтыш класслам туныктышо Е.В.Васильева каласкален. Варажым погынышо-влак Карайысе школ пеленысе йочасадын воспитательже Э.В.Васильеван «Шымавий кован йомакше» альбомым ыштымыж нерген куанен колыштыныт.
Учебникым ямдылыме да вес кундемыште тыге урокым эртарымаш – пеш кӱлешан сомыл, педагоглан вияҥаш, пашам ӧрдыж гычат аклаш сай йӧным пуа.
Эльвира Терентьева.
