Медведево районын Сеҥымашлан 80 ий темме лӱмеш отчётный концертыштыже усталык шӱлышан коллектив-влакын кыртмен пашам ыштымыштын лектышыштым ужна.
Теве «Дебют» образцовый театр-студий гыч (вуйлатышыже – И.Иванова) В.Чакичева Е.Пономаренкон «Леночка» ойлымашыжым лудо. А «Маска» калык театрын (вуйлатышыже-влак – А.Москвина ден И.Иванова) «У войны не женское лицо» спектакль гыч ужашыжым мастарын почын пуыш. Талантан акак-шӱжарак-влакын шындыме номерлаштым шинчам кораҥдыде ончет. Тыште чылажат уло: темын келгытше, чон вургыжмаш, артист мастарлык.
Тыштат йоча-шамыч куандарышт: Медведево районысо тӱвыра пӧртын «Позитив» куштышо образцовый студий «Синий платочек» муро почеш лывыргын куштен.
Сылне йӱкан мурызо Э.Трифонован вуйлатыме «Счастье» ансамбль «Ах, поле, поле» мурыж дене сӧрастарыш. Руш калык мурымак «Светла горница» коллектив шергылтарен.
Пӱкшерме тӱвыра пӧртын «Весела кумыл» коллективше «Вӱд йоген куштымаш» номерыште марий койышым ончыктен. Медведево вел марий-влакын мурышт дене «Эр ӱжара» ансамбль куандарен. Знаменский гыч Э.Петрован вуйлатыме коллектив марий такмак-влакым муралтен.
Ончаш толшо-влакым «Письмо солдату» муро сар жапым пӧртылтен гын, «Вальс Победы», «Россия – это мы», «Россия» куштымаш-влак элна дене пырля кызытат ончылно лияш ӱжыныт.
Ты концерт гыч О.Прокопчукын уло чон дене лудмо «Моё солнышко» почеламутшо (авторжо – С.Алексиевич) шинчавӱдымак лукто да кызыт СВО-што ӱмыр лугыч лийше салтакна верч шортшо аван ойгыж семын ушеш шыҥдаралте.
Тыгак мучаште SHAMAN мурызын калыкым икоян лияш ӱжшӧ «Встанем» мурыжым зал шогышыла вашлийын.
