«Мемнан Сеҥымаш кечына» («Наш День Победы») акцийлан кӧра Сеҥымаш мурым икымше гана татарла йоҥгалтареныт. Интернетыште акций нерген материал-влак #песнипобедыПФО #нашденьпобеды хештег дене шыҥдаралтыт.
Видеом Казаньыште Тӱвыра да искусство институтышто, Совет Ушем Герой Муса Джалильлан Озаҥ Кремль воктенысе памятник ончылно, возымо.
— Акций регион-влакым уша да тӱрлӧ калыкын тӱвыраж дене утларак палдараш полша. Чыла тидыже Кугу Сеҥымашыш шуаш ушко вийым пыштыме нерген ойла, — манеш Озаҥысе тӱвыра да искусство институтын ректоржо Роза Ахмадиева.
Сар ийлаште Татарстан Йошкар Армийлан тылыште улшо базылан шотлалтын. Республикыш 70 утла завод ден фабрикым эвакуироватленыт, 226 тӱжем еҥ тышке илаш толын, нунын коклаште 15 тӱжем йоча лийын. Сар пуламыр жапыште 50 госпитальым почмо, тушто 334 тӱжем салтак эмлалт лектын.
Татарстанын 100 утла тӱжем шочшыжо орден да медаль дене палемдалтын, 186 еҥ Совет Ушем Герой лӱмым сулен, Николай Георгиевич Столяров кок гана тыгай лӱм дене палемдалтын. Республик гыч сарыш кайыше 700 тӱжем наре еҥ гыч пелыже наре мӧҥгӧ пӧртылын огыл. Нунын лӱмыштым 28 томан республикын Шарнымаш книгаштыже возымо.
Ушештарена: 8 май марте Юл кундем федеральный округысо чыла регионышто Сеҥымаш муро тыште илыше калыкын йылмыж дене йоҥга. А 9 майыште марафон иктешлалтеш.