«Мемнан Сеҥымаш кечына» (Наш День Победы) акцийыш Пермь кундем ушнен. Россий президентын Юл кундем федеральный округысо полномочный представительжын темлыме акций нерген Интернетыште материал-влак #песнипобедыПФО #нашденьпобеды хештег дене шыҥдаралтыт.
Акцийлан ямдылалтме годым «Сеҥымаш кече» мурым Пермьысе эрге-влак хор капеллын 20 артистше-влак Пермь опер да балет театрын солистше-влак Наталья Кириллова, Владимир Тайсаев, Эдуард Морозов дене пырля муреныт. Легендарный мурым нуно Пермь крайысе филармонийын руш калык семӱзгар оркестрын шоктымыж почеш йоҥгалтарат. Видеороликым элыштына мӧҥгыштӧ шинчыме режимым увертарыме марте возымо.
Кугу Отечественный сар жапыште Пермь кундем фронтлан авиадвигательым, пычалтар ден пушкым ситарыме деч посна йолчиемым ямдылымыж дене ойыртемалтын. Кунгурышто кемым ургымо предприятий кумдан чапланен. Тушман ваштареш кучедалше кажне кумшо салтак тышеч колтымо йолчиемым чиен манын палемдат. А салтак-влаклан каскым СССР годым тысе Лысьва олаште гына ыштеныт. Мландышӱйым лукшо Кизеловский бассейныште шахтер-влак, Чусовысо да Нытвасе металлург-влак, Краснокамскысе нефтяник ден Верхнекамьесе химик-влак уло элысе пашазе семын «Чылажат фронтлан, чылажат сеҥымашлан!» манын тыршеныт. Молотовский областьысе кугу госпитальыште Ленинград гыч эвакуироватлыме пеш шуко еҥым вашлийыныт.
Ушештарена: 8 май марте Юл кундем федеральный округысо чыла регионышто Сеҥымаш муро йоҥгалтеш. А 9 майыште марафон иктешлалтеш. «Мемнан Сеҥымашна» («Наш День Победы») акцийыш але марте Мордовий, Марий Эл, Удмуртий, Башкортостан, Самара область да Татарстан ушненыт. Нижегородский область деч вара эстафете в Пермь крайыш куснен.
Сайт ден социальный сетьлаште проект нерген #нашденьпобеды, #песнипобедыПФО хештег гоч пален налаш лиеш.