«Мемнан Сеҥымаш кечына» (Наш День Победы) акцийыш Чуваш Республик ушнен. Россий президентын Юл кундем федеральный округысо полномочный представительжын темлыме акций нерген Интернетыште материал-влак #песнипобедыПФО #нашденьпобеды хештег дене шыҥдаралтыт.
Тиде акцийлан лӱмын «Сеҥымаш кече» мурым шке шочмо йылмышкыже Чуваш Республикысе культурын сулло пашаеҥже, Чувашийын калык поэтше Юрий Семендер кусарен.
Видеосюжетым элыштына мӧҥгыштӧ шинчыме режимым увертарыме марте республикысе «Победа» мемориал комплексыште, Воин чап тоштерыште, «ДК Тракторостроителей» калык усталык рӱдерыште возымо.
— Мыланна тыгай акцийыш ушнаш чап. Ме Сеҥымашым кондышо кажне землякна дене кугешнена. Тыгай муро марафонлан кӧра эше ик гана ветеранна-влаклан тауштен, лӱддымылыкыштым, патырлыкыштым пеҥгыдемден кертына, — каласен Чуваш Республик вуйлатышын пашажым жаплан шуктышо Олег Николаев.
Сар жапыште Чуваший гыч 208 тӱжем еҥ каен, пелыже утла пӧртылын огыл. Тылыште кодшо-влак фронтлан мо кӱлешым ситараш уло вийыштым пуэныт. Республикыш 28 завод ден фабрикым пашазе-влак дене пырля эвакуироватленыт. Тысе 11 кугу предприятий пашам ыштен.
Пӧртым чоҥымо Козловский да пум обрабатыватлыше Шумерлинский комбинат-влак фронтлан самолетым да планерым ямдылыме пашашке кусненыт. Канашсе вагоноремонтный да Алатырьысе паровозым олмыктышо завод-влак тусо жаплан пеш кӱлешан лийыныт, тыште тӱҥ паша деч посна артиллерий снарядым, бронепоезд ден бронетранспортёрым лукташ тӱҥалыныт.
Ушештарена: 8 май марте Юл кундем федеральный округысо чыла регионышто «Сеҥымаш кече» муро йоҥгалтеш. А 9 майыште марафон иктешлалтеш. «Мемнан Сеҥымашна» («Наш День Победы») акцийыш але марте Мордовий, Марий Эл, Удмуртий, Башкортостан, Самара область да Татарстан, Нижегородский область, Пермь край, Саратов, Ульяновск область ушненыт. Пенза деч вара муро марафон Чувашийыш куснен.
Сайт ден социальный сетьлаште проект нерген #нашденьпобеды, #песнипобедыПФО хештег гоч пален налаш лиеш.