«Мемнан Сеҥымаш кечына» («Наш День Победы») акций эртыме кумшо кечын Сеҥымаш мурым удмурт йылме дене икымше гана йоҥгалтареныт. Интернетыште акций нерген материал-влак #песнипобедыПФО #нашденьпобеды хештег дене шыҥдаралтыт.
Мурым Удмуртийын кугыжаныш филармонийжын кок чапланыше коллективше мура: Академический хор капелле ден Келшымаш орден дене палемдалтше, Анатолий Мамонтов лӱмеш «Италмас» мурышо да куштышо академический ансамбль.
Сар годым Удмуртий тылыште фронтлан ситарыше базылан шотлалтын. Москва, Киев, Тула, Харьков олала гыч 50 утла промышленный предприятийым тышке кусареныт. Сар ийлаштак стратегический кӱлешан Ижевск – Балезино кӱртньыгорным чоҥеныт. Ижевский машиностроительный завод 11 миллион стрелковый оружийым — винтовко ден карабиным — ямдылен. Воткинский завод фронтыш 53 тӱжем утла артиллерий орудийым колтен.
Ушештарена: 8 май марте Юл кундемысе чыла регионышто Сеҥымаш муро тӱрлӧ калыкын йылмыж дене йоҥга. 25 апрельыште мордва йылме дене муреныт, нунын почеш — марла да удмуртла.