Шукерте огыл Чӱксола тӱвыра пӧртыштӧ самырык специалист пашам ышташ тӱҥалын. Дарья Шабалина изинек мураш да кушташ йӧрата.
У Торъялыште Э.Н.Сапаев лӱмеш йоча сымыктыш школышто хореограф ий отделенийыште шуаралтын, «Линкс» куштышо коллективышкат ушнен. Ӱдыр У Торъял посёлкышто шочын-кушкын, марлан лекмеке, Чӱксола ялыш илаш куснен.
– Мый Оршанкысе И.К.Глушков лӱмеш шуко профилян колледжыште воспитательлан тунемам. Чӱксола тӱвыра пӧртыштӧ пашаеҥ ситен огыл, сандене мыйын ӱжыныт. Тыге 2023 ий май гыч художественный вуйлатышылан ыштем.
Тыште «Ош куэ» вокал ансамбль уло. Тудым Зоя Ивановна Демидова вуйлата. Кеч тудо сулен налме канышыште гынат, ме пырля кутырен пашам ыштена. Нунын дене тӱвыра пӧртыштына да У Торъял районышто выступатлена. У Торъял районлан 100 ий теммылан пӧлеклалтше концертыште выступатленна, – мане Д.Шабалина.
Тыгак Дарья ялысе йоча-шамычым эстрадный да калык куштымашлан туныкта. Кызыт 10-15 ияш кум ӱдыр кушташ коштеш.
– Календарь почеш чыла мероприятийым ыштена. Книгагудо пелен «Поро кумыл» клуб дене пырля арнялан 2-3 гана музык да литератур вашлиймашым, модыш конкурсым, каныме касым эртарена.
Ялыште пашам ышташ ласка, но икте тургыжландара: калык шагал да самырык тукым мероприятийыш, пайремыш огеш ушно, – ойла Д.Шабалина.
Д.Шабалинан альбомжо гыч налме фото.