манеш Наталья Беликова.
– Сцене – тиде мыйын изи тӱням. Тушто мый шке мастарлыкемым почын кертам. Кажне гана калык ончыко лекме годым тургыжланем, но еҥ-влакын шинчаштым ужаш – пиал, – палдарыш ӱдыр.
УСТАЛЫК ШӰЛЫШ – ВӰРЫШТАК
Наташа Шернур посёлкышто шочын-кушкын. 1-7-ше класслам Шернурысо 1-ше №-ан школышто тунемын. Аваже да коча-коваже ӱдырым изиж годсек мурен-кушташ кумылаҥденыт. Аваже Лариса Аркадьевна музык урокым туныкта, кочаже Аркадий Макматов гармоньым шокташ, мураш йӧрата, коважат Нина Ивановна мураш кумылан. Сандене Наташаланат усталык шӱлыш вӱр дене куснен.
Н.Беликован кандашымше классыш вончымыж годым ешыже Йошкар-Олаш илаш куснен. Умбакыже ӱдыр шинчымашым 27-ше №-ан школышто поген. Туге гынат мурымым чарнен огыл, «Фантазия» вокальный ансамбльын участницыже лийын. Тудым Л.А.Беликова вуйлатен.
Кызыт Наташа И.С.Палантай лӱмеш тӱвыра да сымыктыш колледжын «Менеджер социально-культурной деятельности» направлений дене 4-ше курсышто тунемеш. – Шонымашем шукталтын: колледжыш тунемаш пуренам, умбакыже чонлан лишыл сомыл йӧратыме пашашке кусна, – ойла Н.Беликова.
МЕР ПАША
Тылеч посна студентке колледж пелен Марий Эл Республикын тӱвыра волонтёржо тӱшкаште пашам шукта. Ӱдыр-рвезе-влак тӱвыра мероприятийлаште полышкалат, пайрем ден вашлиймаш-влакым эртарат.
Ты пашам уло кумыл дене шуктымыжлан 2020 ий 18 декабрьыште Наташалан Республикысе тӱвыра, печать да калык-влакын пашашт шотышто министерстве лӱм дене таумутым да пӧлекым кучыктеныт.
Тыгак Н.Беликова инвалид-влакын кеҥежымсе III спартакиадыштышт участвоватлен, тӱрлӧ мероприятийым эртарен. 2018 да 2019 ийлаште колледжыште эртаралтше «Идалыкын студентше» конкурсышто «За творческие и общественные достижения» номинацийыште палемдалтын.
– Эн чот ушеш вочшо шарнымаш – Марий Эл Республикым вуйлатыше Александр Евстифеевым икмыняр гана кинде-шинчал дене вашлиймаш, – палдарыш ӱдыр.
Теорийым практик дене пеҥгыдемдымеке веле тудо сайын шарналт кодеш. Сандене Наташа идалык мучко погымо шинчымашыж дене кеҥежым йоча лагерьлаште, санаторийлаште пайдалана. Тудо вожатыйлан але тӱшка мероприятийым эртарыше еҥлан пашам ышта.
Тылеч посна кажне кеҥежым «Журавушка» социально-реабилитационный рӱдерыште ийготыш шудымо йоча-влаклан мероприятийым эртара. Тений Н.Беликова колледжым тунем пытара. Умбакыже Москосо кугыжаныш тӱвыра институтышто шинчымашым погаш шона.
Ӱдырын альбомжо гыч налме фото.