Сату огеш шергешт

Марий Эл Республикым вуйлатыше Александр Евстифеев Россий  Правительстве председательын икымше алмаштышыже Андрей Белоусовын селекторный совещанийыштыже участвоватлен.

Тӱҥ йодыш – Российысе экономикым вияҥдымаш.

Коронавирус шарлыме жапыште Марий Эл республикысе Правительствын пунчалже почеш экономический стабильностьым кучаш оперативный мерым ямдылыме да илышыш шыҥдарыме шотышто региональный штабым ыштыме.

Республикыштына ятыр паша верым темлыше, социальный стабильностьым пуышо, региональный значениян 100 предприятийым системообразующий манме переченьыш пуртымо. Тушто промышленность, ялозанлык, чоҥымо, фармацевтический, ЖКХ ден транспорт, почто ден телекоммуникационный кыл, торговльо ден изирак бизнес организаций-влак улыт.

Ситуацийым эскерыме амал дене республикысе власть орган-влак нине организаций-влакын финансово-экономический состоянийыштым тергат.

Продукций чылалан ситыже да тыгодым ак тугаяк кодшо манын, мониторингым эртарыше оперативный штабым ыштыме. Кажне кечын 52 тӱрлӧ сатун акшым тергат.

Марий Элыште ак шотышто чыла сай, кочкыш сатулан кугу йодмаш огеш шижалт. Ялозанлык сатуат шергештын огыл.

Марий Эл Республикысе ялозанлык министерстве ялозанлык да промышленный предприятий-влакын сатум ужалыме кокла акыштым да сату шапаш улмым кажне кечын эскера.