Саскам кужун аралена

Помидорым

Вараш шындыме ужарге, ошалге сай помидорым ойырыза да решотка леведышан яшлыкышке саскакыл дене кӱшкыла пыштен оптыза. Яшлык йымаке да помидор-влак коклашке тыгыде кукшо пилашӱкым (куэн сайрак) але торфым пыштыза. Тыге помидор 12 градус шокшышто 1 тылзе гыч 3 тылзе марте аралалт кертеш.

Кавуным

Кавун дене тӱрлӧ кочкышым, вареньым, компотым шолташ лиеш. Шукын телыланат ситышым поген кодаш тыршат. Кужунрак аралалтше манын, пакчасаскалан 10-14 градус леве юж кӱлеш, да южын вӱдыжгылыкшӧ 70-75 процент лийшаш. Ты культурым пачерыште койко йымалне але шкафыште аралаш йӧнан. Но тыгодым саскам жапын-жапын ончалман. Кавуным аралаш пыштыме годым тудо сайын шуэш, кӧргыштыжӧ сакырложаш, каротин шукемеш.