13-14 мартыште Ульяновскышто Юл кундем федеральный округысо законодатель-влакын ассоциацийыштын 75-ше заседанийже лийын.
Тушко Марий Элысе Кугыжаныш Погынын председательже М.Васютин ден Молодёжный парламентын председательже, Кугыжаныш Погынын депутатше Мария Дорогова миен коштыныт.
Регионласе закорганлам вуйлатыше-шамыч «Авиастар» авиастроительный заводым ончен савырненыт, историйже да производствыже дене палыме лийыныт, тыгак авиастроенийлан специалист-влакым ямдылыме йодышым каҥашеныт.
Кызыт предприятий 2,5 тӱжем пашаеҥым налаш ямде. Ульяновскысо колледж ден вузла дене поснак кугу йодмашан инженерно-технический специальность дене специалист-влакым ямдылыме шотышто кутырен келшыме. Авиазавод тыгак «Крылья Ростеха» целевой тунеммаш программыш ушнен. «Авиастарыште» самырык специалист-шамычлан пайдале системе пашам ышта, южо программе дене нунылан илыме вер да «подъёмный» окса пуалтыт.
ПФО-со Молодёжный парламентын ассоциацийжын членже-влак предприятийыште наставник-влакын пашашт шотышто йодыныт. Палемдыме: тыште специалист-влакым профессионально ямдылыме системе уло: опытан мастер-шамыч у пашаеҥ-влакым кум тылзе туныктат, квалификационный пашам шуктымо деч вара нунылан разрядым пуат. Варажымат самырык пашаеҥ-шамычлан профессийым пален налаш да адаптацийым эрташ полшат.
Молодёжь дене пашам ыштыме шотышто Угарманысе «Сокол» авиастроительный заводын представительже Арина Лебедеват шке опыт дене палдарен. Тудын мутшо почеш пашаеҥ-влакын кумшо ужашыже – 35 ияш марте самырык тукым. Нунылан целевой тунемаш йӧн, илыме верым налаш льгото пуалтыт, профмастарлык шотышто конкурс да тӱрлӧ культурно-массовый мероприятий эртаралтыт.
ПФО-со Законодатель-влакын ассоциацийыштын координаторжо, Угарман кундемысе Кугыжаныш Погынын председательже Евгений Люлинын палемдымыж почеш, эртыше вашлиймаш ончыктен: самырык тукым предприятийлаште пашам ышташ гына огыл, тудым кӧргӧ гыч вашталташ ямде. Тудо шке шонымашышке шуаш тыршыше-влак стимул деч посна тыршат, шкешт драйвер улыт, лачак нуно молодёжный советыш пурталтыныт, а эрласе кечын грамотым палыше вуйлатыше лийыт да промышленностьым у кӱкшытыш нӧлталаш полшат манын ӱшанен ойлен.