19 майыште элыштына Пионерийын кечыжым палемденыт. Поснак кугурак ийготан-влак тиде пайремым аралаш тыршат. Лач ты кечын мыланна йоча жапышт нерген каласкалат: кузе нуным эн ондак октябрёнокыш, вара пионерыш, а пытартышлан комсомолыш пуртеныт.
Морко районышто чыла школыштыжак тиде пайремым огыт палемде. А Шӱргыял школыштына Пионерий кечым поснак кугу кумылын вучен шогена. Чумыр школ дене построенийым эртарена. Тушто кажне отряд вуйлатыше дружине председательлан рапортым пуа, барабанщик-влак пайремым почыт. Вожатыйна Е.В.Григорьева пионерийын историй йыжыҥлаж дене палдара.
Тиде ийынат 19 майыште Пионерий кечым палемдышна. «Рвезе тукым» йоча ушемнан гимнже почеш пайрем тӱҥале. Кажне отряд шке мурыжым йоҥгалтарыш. 4-ше классым пытарыше ик тунемшым пионер радамыш пуртышна. Тудо товатмутым чылан ончылно ойлыш. Вара адакат «Рвезе тукым» йоча ушемнан гимнжым орлятский кругышто муралтышна да Пионерий кечым мучашлышна.
Тек ончыкшымат тиде йӱла аралалтынак шога. Лач тыге ме, самырык тукым, икте-весым пагалаш да шочмо элым йӧраташ тунемын кушкына.
Стелла Кузнецова, Шӱргыял школ.
Снимкыште: Пайрем годым. Пионер радамыш пурышо Эвелина Новикова.