Салют огеш лий?

 

 Эше сентябрьыште Политикым шымлыше институтын директоржо С.Марков Российысе олалаште фейерверкым колташ чарыме шотышто ойлен ыле.

10 сентябрьыште Москолан 875 ий темме пайрем кечын оласе 23 вер гыч фейерверкым колтеныт. Лачак тидыже калыкыште умылыдымашым луктын. Донбассыште еҥ-влак кредалыт, илышышт ӱмыр лугыч лиеш, тыгодым салютым колтымаш келшен ок тол маныныт.

Варажым Тула олаште Оружейникын кечыжлан, Краснодар крайысе Крымск районын шочмо кечыжлан да Крымск олан 160 ияш лӱмгечыжлан фейерверк ышт лий. Ростов-на-Дону олан пайремжат салют ден концерт деч посна эртыш.

Марий Элыштат 26 декабрь гыч 8 январь марте пожар ваштареш кучедалме режимым увертарыме. У ий да Рошто пайрем годым калык погынымо верлаште салютым, фейерверкым, петардым колташ да тулым лукшо моло настам кучылташ огеш лий. Тыгак тидым пожар лӱдыкшыдымылык шотышто нарушениян объект-влаклан ышташ чаралтеш. Ты радамыш канышым организоватлыше, кочкышым темлыше тӧнеж-влак пурат.

МЧС пашаеҥ-влак республикыште илыше-влакым тул дене поснак тӱткӧ лияш йодыт. Теве ӱмаште У ий йӱдым Йошкар-Олаште Прохоров уремысе 42-шо №-ан пӧртын визымше пачашысе пачерышкыже салют логалын, балкон йӱлен. Йӧра, иктат эмганен огыл, оза-влак унала каеныт улмаш.

31 декабрьыште кок пожар талышнен: Советский районысо Михайловка ялыште монча, а Йошкар-Оласе Крылов уремыште бытовой пӧлем йӱленыт. Шекланыза, йолташ-влак!