8 январьыште Салехард олаште илыше марий-влак «Шорыкйол» касым эртареныт.
Пайремым тысе «Мари кундем» да пошкудо Лабытнанги ола гыч «Шӱм сем» ансамбль-влакын артистышт сӧрастареныт. Шорыкйол пайрем Ямал-Ненец АО-н рӱдолаштыже икымше гана эртен.
– Калык шагал лиеш манын лӱдынна ыле. Юмылан тау, шукын толыныт. Пайремыште ты олаште илыше руш да ненец-влакат лийыныт. Уна-влаклан пайрем пеш келшен, – ойла Леонид Григорьев. Тудо 2013 ий шыжым Салехардыште «Мари Кундем» ансамбльым чумырен да кызытат ты коллективым вуйлата.
Денис Рыбаков.
Салехард ола.
