Таче марий калыкын ик тале эргыже, журналист, мер пашаеҥ, Марий Элын сулло журналистше, Россий культурын сулло пашаеҥже, историй шанче кандидат Александр Абдулов шке 60 ияш лӱмгечыжым палемда. Тудо 1960 ий 16 апрельыште Башкир АССР, Мишкан кундем, Кугу Соказа ялыште шочын.
Александр Саликович 1999 ий гыч таче кече марте «Марий Эл» газетын тӱҥ редакторжылан ышта. А тылеч ончыч Марий телевиденийыште, Марий Эл Республик президентын администрацийыштыже тыршен.
Мыланна тудын лӱмжӧ, паша надырже поснак шерге, вет самырык-влаклан 1991 ийыште лекташ тӱҥалше «Кугарня» газетын икымше тӱҥ редакторжо А.Абдулов лийын.
Лӱмгечыда дене шокшын саламлена, Александр Саликович! Тазалыкда эреак пеҥгыде лийже, самырык гаяк чолга кумылан, илышлан куаныше лийза, марий калыклан вияҥашыже ончыкыжымат уло вийдам пуэда манын ӱшанена!