Марий Элысе школлаште «Марий Эл – территория заботы и заботливых людей» проект илышыш шыҥдаралтеш. Ты проект почеш, тунемше-шамыч регионысо социально кӱлешан пашам шуктат – йырым-йырысе кумдык да еҥ-влак верч азапланымыштым ончыктат.
Тыге, мутлан, Марий Турек район Косолоп селасе школын 6-шо классыштыже тунемше-влак верысе памятник деке корным эрыктеныт. Тыгак С.Суворов лӱмеш йочасадыште арулыкым ышташ полшеныт.
Советский район Алексеевский посёлкысо школын 3-шо классыштыже тунемше-шамыч кайык-влаклан кормушкышто кочкыш уло але укем эскерат. Кажне кечын шулдыран йолташ-влаклан тӱрлӧ сийым оптат.
Звенигово район Кокшайск селасе школын тунемшыже-шамыч У ий деч ончыч «Забота о младших «Мы – друзья» акцийыш ушненыт. Кугурак класслаште тунемше ӱдыр-рвезе-влак тӱҥалтыш класслаште тунемше-шамычлан оҥай да весела программым эртареныт. Тыгак пайремлан келшыше открыткым ышташ туныктымо мастер-классым ямдыленыт.
Йошкар-Оласе 9-ше номеран школын активистше-влак пайрем кечылаште пашам ыштыше-шамыч деке лектын коштыныт. Пашаеҥ-шамычым кумылым нӧлтышӧ вучыдымо пӧлек дене куандареныт.
Козьмодемьянск оласе лицеист-влак социально кӱлешан сомылым шуктышо пашаеҥ-шамычлан У ий шӱлышым пӧлекленыт. Сай тыланымашан оҥай программым ямдыленыт.
Шернур район Марисола школын 5-ше классыштыже тунемше ӱдыр-рвезе-влак ФАП-ыште, кевытыште, пожарный частьыште, верысе книгагудышто, котельныйыште тыршыше-шамычлан йомак программым ончыктеныт да кумылым нӧлтышӧ сувенир-влакым пӧлекленыт.
Марий Элысе Образований министерствын сайтше гын налме фото.