Россий Президентын 2018 ий 7 майыште лукмо «О национальных целях и стратегических задачах развития Российской Федерации на период до 2024 года» указшын тӱҥ задачыже – корно туткар деч аралаш. «Безопасные и качественные автомобильные дороги» нацпроектын цельже – корнышто туткар лийын кертме верым шагалемдаш.
2019 ийыште Марий Эл Республикысе корнылаште ДТП лийме вер 85,7 процентлан шагалемын. Тиде цельыш шуаш икмыняр мероприятий-влак эртаралтыныт: корнышто волгалтарыше понар ден делиниатор-влакым (корным ойырышо изи меҥге) вераҥдыме, светофор-влакым шотыш кондымо, йолешке-влакын корным вончымо верлаште ешартыш освещенийым, искусственный тӧрсыр-влакым, нарынче тӱсан корно разметкым ыштыме. Тыгак 2019 ийыште чылалан пайдаланаш лийме корнышто фото-видеофиксаций системе пашам ышташ тӱҥалын. 67 стационарный, кусаркалыме, мобильный комплекс-влак корнышто правил-влакым пудыртымашым эскерат. 2018 ийыште 22 тыгай комплекс лийын.
Тений тиде паша умбакыжат ышталтеш. Йошкар-Олаште корно туткар лийын кертме 22 верым кораҥдаш палемдыме. Тушто авыртышым, тыгак кудал пураш але жаплан чарнаш изирак кумдыкым («кармашкым»), термопластик дене у разметке-влакым ышташ, корно пале-влакым вераҥдаш, светофор объект-влакым у верыште шогалташ тӱҥалыт. Кызытсе жаплан пешеходный авыртыш-влакым Красноармейский ден Осипенко корнывожышто ыштат. Пашам «Вектор» ООО наҥгая.