Сад-пакчазылан календарь

 

25 майыште пареҥге саскан, шудан да пӱтырналтше кушкылым шындаш, ӱдаш ок йӧрӧ. Тыгак ядохимикатым ида шаве. Компостым пуаш сай кече. Ты кечын печке гыч ковыштам луктыда гын, шуко бактерий погынен кертеш.

26 майыште росотам, укшым кусарен шындаш ок йӧрӧ. Мландым кӱнчаш, вӱдым шаваш, кушкыллан подкормкым пуаш, шӱкым кӱраш лиеш.

27 майыште помидорым, пурысым, баклажаным луктын шындаш шотлан толеш. Тыгак салатлан, шпинатлан, горчицылан азотан ӱяҥдышым пуаш лиеш (1 кв м пакчалан 15-20 г мочевине кӱлеш).

28 майыште кавуным, кечшудым, кукурузым, арбузым, тыгак декоративный кушкылым шындаш келша. Газоным ӱдыза. Вишньылан, олмапулан, грушылан, сливылан прививкым ыштыза.

29 май – шукш-копшаҥге ваштареш кучедалаш сай кече. Пареҥгым шындаш ок йӧрӧ.

30 майыште годецийым, маттиолым, календулым, энотерым ӱдеда гын, кужун пеледеш. Ты кечын ирислан подкормкым пуыман (пеледышлыкше уло гын). 1 кв метр 20-30 г пакчалан аммиачный селитрам, тынарак калийный шинчалым вӱдеш варен шавыза.

31 майыште розым да моло пареҥган пеледышым шындаш келша. Лилийлан, пионлан, тюльпанлан, нарцисслан подкормкым пуыза. Ты кечын пакчасаска росотам ида шынде.

 

 

Эльвира Терентьева ямдылен.