23 июль — Сад-пакчазын кечыже. Вате—марий Мария Капитоновна Иванова ден Николай Петрович Васильев 30 ий ута пырля илат. Йошкар-Ола воктенысе «Агрохмик» садыште участкым нал-мыштлан тынарак жап шуэш. Николай профессийже дене – чоҥышо. Мария ӱмыржӧ мучко медпашаеҥ лийын. Коктынат Морко район гыч улыт. Изинекак ялыште мландылан шӱмаҥше, сад-пакча пашалан тунемше кушкыныт. 8 сотыкан участкыштышт нуно кӱчык жапыште олмам, вишньым, грушым, шоптырым, пуншоптырым, эҥыжым да моло тӱрлӧ вондерым шындылын, саскам налаш тӱҥалыныт.
Кермыч дене кок пачашан изирак пӧрт-мончам ыштеныт, воктекак яндан верандым келыштареныт. Сулен налме канышыш лекмекышт, яра жапыштым телыже-кеҥежше тыште эртарат. Нунын дек ӱдырышт, уныкашт чӱчкыдын толыт. Вате-марий моло уналанат чот куанат. Нуным емыж-саска дене сийлат, мончаш олтат, порын мутланат.
Пошкудышт 73 ияш Геннадий Васильевич Антипов, Вера Леонидовна ден Иван Кириллович Васильевмыт дене келшен илат. Эре ваш-ваш полшен шогат.
Чынже денак, олаште илыше илалше еҥ садыште кид-йолым лывыртыме дене пырля чоным кандара, яндар южышто лиймаш тазалыкым пеҥгыдемда.
Иван Речкин.
Авторын фотожо.