Таче тендам Курыкмарий район Виловат селаште шочшо А.Смирнова дене палымым ыштена. Тудо республикысе палыме ача-аван – Лидия Никаноровна ден Николай Алексеевич Смирновмытын ӱдырышт.
Ачаже — республикысе президентский сымыктыш школын директоржо, аваже — «Сосновый бор» санаторий директорын алмаштышыже.
Ты ешын ансамбльжым ме ятыр концертыште да мероприятийыште ужынна ыле. Смирновымытын Агата ӱдырышт ден Артём тӱҥалтыш музыкальный шинчымашым ешыште да Марий Элысе национальный президент школышто погеныт. Агата 2010 ийыште И.Палантай лӱмеш тӱвыра да сымыктыш колледжым «Фортепиано» специальность дене тунем лекме деч вара ӱдырын корныжо Москошкыла шуйналтын. Гнесинмыт лӱмеш Российысе музык академийыште «Музыковедение» специальность дене вич ий тунемын. А 2018 ийыште Кинон Московский школжым тунем лектын да «Кинон композиторжо» специальностьым налын.
Агата Смирнова – мурызо, композитор, пианистке, этномузыколог, преподаватель да тӱрлӧ финн-угор ден тӱнямбал музыкальный конкурслаште сеҥыше. Сандене тудо кызыт уло вийжым творчествылан пуа, ятыр концертыште выступатла, кинофильм-шамычлан музыкым воза.
Агата изиж годым шке фамилийжым чын каласен моштен огыл да Симора манын ойлен. А кызыт мурызо шкаланже тыгай псевдонимым налын — Агата Симора.
А ешартыш пашаже – туныктымаш. Агата Москошто шке школжым почын. Тушто йоча-влакым фортепиано дене шокташ, мураш туныкта, «Теория музыки» ден «История музыки» дене келге шинчымашым пуаш тырша.
Ӱдыр мер пашаштат чолгалыкшым ончыкта. Тудо Москосо марий молодёжь ушемым вуйлата, Российысе Кугыжаныш Думо пеленысе Молодёжный парламентын культур шотышто экспертный советын членже.
Тений 21 апрельыште А.Смирнова марий калыкын чапшым «Национальные истоки красоты» тӱнямбал проектыште арален. «Шке калыкым тыгай кӱкшытан пашаште ончыкташ, мутат уке, ответственностьым шижат да моткочак тургыжланет. Тиде – тӱнясе чыла тӱрлӧ национальностян ӱдыр-влакын моторлыкыштым ончыктымо деч вара художественно-документальный да шымлыше проект почеш шуктымо паша. Тушто калык-влакын этнокультурный ойыртемыштым ончыктат. Тидлан тӱрлӧ критерий почеш ӱдыр-влакым ойырен налыт. Вет тушто сӧрал чурийвылыш, фотогеничный манме сын лийшаш. Ик условийже – тукымвожышто эн шагалже кум тукым марий калыкын шочшыжо-влак лийшаш улыт. Тыгак марий улам манме умылымашымат шотыш налыт, тӱвырам, илыш-йӱламат палыман», – манеш Агата.
Организатор-влак ты проектыш Агата Смирновам эше 2015 ийыштак ӱжыныт улмаш. Жап укелан кӧра ӱдыр Парижыш каен кертын огыл. А тений ты проект Москошто эртаралтын. Мотор ӱдырым ныл шагат сниматленыт. Ты жапыште ӱдыр курыкмарий калыкше дене палдарен, тудын йӱлаже, тӱвыраже, музыкшо, йылмыже да историйже нерген каласкален. Тыгак курыкмарий национальный вургемым, сӧрал чурийжым сниматленыт. Варажым Агата сылне курыкмарий калык мурым муралтен. Тушто марлан кайыше ӱдырын шочмо суртшым да ешыжым коден кайыме нерген ойлалтеш.
Ты проект 2012 ий годсекилышыш пурталтеш. Тачысе кече марте 15 элысе 50 утла этносым ончыкташ манын, 90 наре фото ден видео-портрет-влакым ыштыме.
Проектыште ик калык нерген кум участник полшымо дене каласкала. Тымарте «Les Origines Dela Beaute» («Национальные истоки красоты») проектлан полшышо Францийыште верланыше ассоциаций курыкмарий ден олыкмарий ӱдырым сниматлен. Кызыт эрвелмарий ӱдыр-влак деч конкурсыш йодмашым вучат. Вашкыза! Йодмашым lesoriginesdelabeaute@gmail.com электрон почто дене колтыман.