Самырык патриот-влак Марий Элым Вуйлатыше Юрий Зайцев ден Российын Геройжо Анатолий Иванов дене вашлийыныт.
Специальный военный операцийын участникше, Российын Геройжо дене Ю.Зайцев кадет да военно-патриотичесий ушемласе воспитанник-влаклан патырлык урокым эртареныт.
Ты мероприятий «Диалоги с Героями» Российысе проект кышкарыште эртаралтын. Тушто патриотизм, Шочмо элым йӧратыме да тудым аралаш ямде улмо нерген кутыреныт, военный специальность ден спорт дене кылым кучымашын кӱлешлыкше нерген каҥашеныт. Тыгак йоча-влак Геройлан йодышым пуэденыт.
А.Ивановлан кодшо ийын подвигым ыштымыжлан «Российын Геройжо» званийым пуэныт. 2023 ий сентябрьыште тудо специальный военный операций кайыме верыште «Challenger 2» танкым ик гана лӱйымаштак пытарен. Кужэҥер районышто шочшо землякналан кӱкшӧ наградым Россий Президент Владимир Путин кучыктен.
Марий Элым Вуйлатыше йоча годсо жапшым шарналтен, ачаж ден кочаже пример лийыныт манын. Тыгак молодёжьлан Анатолий Иванов гай Герой-влак деч тунемаш ойлен.
Вашлиймашыш толшо-влак фронтышто кызыт могай полыш кӱлмӧ нерген йодыныт. Рашемдыме: эн ончычак тушманын беспилотникше деч аралалташ средства, чыла вере кудал кертше машина, маскироватлалташ сеть, чоҥымо материал ден генератор кӱлыт.