Санкт-Петербургышто тӱҥ шинчымашым пуышо «Газпром школа Санкт-Петербург» частный учрежденийыште «Россия – страна возможностей» президент платформысо Россий кӱкшытан «Флагманы образования. Студенты» профессионал конкурсын финалже умбакыже шуйна. Конкурс ныл кече кая (24.06-28.06.2022). Проект Россий Минпросвещенийын, Россий шанче да кӱшыл шинчымашын министерствыже да Самырык-влак шотышто федерал агентствын полшымышт дене ышталтеш.
«Флагманы образования. Студенты» проектыш йодмашым Российысе 84 регион гыч 26955 еҥ пуэн. Конкурсым 2021 ийыште 17 ноябрь увертаралтын. Февральыште участник-влак кум ужашан тестым возеныт. Апрель-майыште 8 олаште (Санкт-Петербург, Моско, Саранск, Томск, Владивосток, Тюмень, Волгоград да Грозный) конкурсын окружной полуфиналже-влак эртеныт. Тушко 800 студент ушнен.
Конкурс педагог лияш шонышо чолга студент-влаклан полышым ышта.
Финалышке 42 регионысо колледж ден кӱшыл шинчымашым пуышо заведений-влакын студентышт эртеныт. Ӱдыр-влак кум пачаш шукырак улыт (76%). Юл федерал округ гыч 18 конкурсант лийын.
Марий Эл Республикым Марий кугыжаныш университетын студентше Екатерина Викторовна Матвеева ончыкта.
Финал жапыште самырык ӱдыр-рвезе-влак шке проектыштым илышыш шыҥдараш 1,5 млн теҥгем налын кертыт. Сеҥыше-влак «Смена» да «Океан» Российысе йоча рӱдерлаште шинчымаш программе-влакым да стажировкым эртат. Лауреат-влак «Больше, чем путешествие» проект кышкарыште турыш оксам тӱлыде миен толыт.