Морко район Нуж-Ключ ялын ÿдыржö Татьяна Яндакова изинек усталык шÿлышан лийын, мураш, кушташ, тÿрлö сценкылаште модаш йöратен. Школ пагытыштак шочмо ялысе клубышто веле огыл, моло вереат мастарлыкшым ончыктен. Но индеш классым тунем пытарымеке, творческий шÿлышан ÿдыр технический шинчымашым налме корным ойыра.
Кызыт Татьяна Йошкар-Оласе Поволжский технологический университетын «Политехник» высший колледжыштыже пытартыш курсышто тунемеш, качествым тергыше контролёр лияш ямдылалтеш.
Т.Яндакова мыланна тыгай профессийым молан ойырен налмыже да шке илышыж нерген икмыняр каласкалыш:
– Школышто тунеммем годым телевизор дене «Ревизорро» передачым ончаш йöратем ыле. Тунам мылам ты профессий моткоч келшен. Садлан «Политехникыш» «Техническое регулирование и управление качеством» направлений дене тунемаш пуренам. Ончыкыжым ты специальность денак вузышко каяш шонем. Кÿшыл шинчымашан диплом деч посна кызыт сай пашам муаш куштылго огыл.
Мылам ойырен налме профессий дене шинчымашым погаш моткоч келша. Кызыт омсам ыштыше ик заводышто практикым эртем, тÿрлö деталь-влакым качестве шотышто тергем. Ончыкыжым ты сферыштак пашам ышташ шонымаш уло. Но такшым качествым тергыше контролёрвлаклан таче кечын пашам муаш неле огыл манын шонем.
Татьяна – моткоч чулым ÿдыр. Спортым йöрата, капкыл тазалыкым эскера, физкультур дене заниматла, яра жапыште пашам ышта.
– Кугу спортсменжак омыл, но капкыл эре йытыра лийже манын, тыршаш логалеш. Мый жапым эре пайдалын эртараш тöчем. Тунемме деч вара Йошкар-Оласе ик кафеште официанткылан пашам ыштем. Тиде шкалан шийвундым ыштен налаш йöным пуа. Эре ачааван кÿшеш илыме ок шу. Тыгак тÿрлö кином ончаш йöратем. Лÿдыктышöшамычат, кумылым тарватыше фильмвлакат келшат. Йоча пагытыште, ача ден аван пырля улмышт годым, тÿрлö передачым ончен шинчена ыле… Тиде ушыштем поро шарнымашым коден. Садлан «Пусть говорят» ден «Мужское и женское» передачевлакымат ончен шинчен кертам, – шыргыжале ÿдыр.
Творческий шÿлыш шотышто ойлаш гын, ÿдырын йоча годсо мастарлыкше нигушкат йомын огыл. Таня колледжыште эртаралтше тÿрлö мероприятийлаште участвоватла. Тидын нерген тудо шкеже тыгерак каласыш:
– Музыкальный шинчымашым налаш йöн лиеш гын, уло кумылын тунемаш пурем ыле. «Колледжын миссше» конкурсышто участвоватлымем годым мурым муралтенам. Тылеч вара мыйым тÿрлö мероприятийлаш ÿжыныт. Муро тÿня чонемлан лишыл.
Кызыт Татьяна диплом пашам воза, иктешлыше экзаменлан ямдылалтеш. Тÿняште улшо ситуацийлан кöра ÿдыр шочмо ялыштыже жапым эртара.
– Тиде неле пагытыште лишыл еҥ-влак пелен лияш тыршем. Ялыште ковам ила. Тыште йокрокланаш жап уке, шошо толмо дене ятыр паша лектеш. Чылаланда сай кумылым, пеҥгыде тазалыкым, лишыл еҥ-влак коклаште умылымашым тыланем. Илышлан йывырташ тунемза, вуйым ида саке, – манеш Т.Яндакова.