Таче Кортысо физкультур йӧн дене тазалыкым пеҥгыдемдыме комплексыште республикынан икмыняр районлаж гыч толшо спортсмен-влак Ялысе телымсе спорт модмаште шке вийыштым, чулымлыкыштым тергеныт. Участник-влак лӱйкалымаште, кирам нӧлтымаште, дартс дене ончыл верыште лияш тыршеныт, отжиманийым ыштеныт, перекладиныште нӧлталалтыныт. Чылан гаяк тӱрлӧ кужытан дистанцийыште ече дене таҥасеныт. Тылеч посна механизатор-влак тракторым вӱдымаште, доярке ден дояр-влак лӱштымӧ аппаратым писын погымаште ӱчашеныт.
Спортым йӧратыше еш-влаклан таҥасымаш «Весела старт» шотан лийын: йоча эн ончыч хоккей клюшко дене мечым капкашке логалташ тыршен, ача авам «ватрушко» дене шупшын наҥгаен, ава вӱдвараш луман ведрам сакен куржталын.
Участник-влак тыгак шахмат, шашке дене ӱчашеныт. Трактор дене таҥасымаште 7 участник гыч кокытшо ӱдырамаш лийын. Нунылан шеҥгек чакнен, навесыш грузым пыжыкташ, кадыр-кудыр корнышто писын кудал эрташ кӱлын.
Мероприятийыште команде дене ончыл верым У Торъял районын спортсменже-влак сеҥен налыныт. Нуно республикынан чапшым Россий кӱкшытыштӧ X Ялысе телымсе спорт модмаште нӧлташ тӱҥалыт. Таҥасымаш 16-20 мартыште Пермьыште лиеш. Моло сеҥыше-влакын лӱмышт тыште.
