Респиратор-влакым эше налыт

Марий Элысе медицине пашаеҥ-влаклан 3 тӱжем аралтыш костюм ден 2,5 тӱжем респиратор-влакым налме. Тидлан республикысе Правительствын резервный фондшо гыч Минздравлан 8 млн теҥге ойыралтын.

Тиде – Марий Эл Республикысе Правительствын резервный фондын оксаж дене налме кокымшо партий. Респиратор-влакым налаш «Респираторный комплекс» ООО (Ленинградский область) дене контрактым ыштыме. Республикыш чылаже 13 тӱжем респираторым кондышаш улыт. Тидлан 1,5 млн теҥге кая.

Аралтыш средстве-влакын кугурак ужашыжым коронавирус инфекций дене черланыше пациент-влакым эмлаш республикысе медучрежденийлаште почмо инфекционный отделенийлашке колтымо.