Редакторын колонкыжо

Александр Саликович АБДУЛОВ (1991-1994)

1991-ше ий, 5-ше июль:
– Тыгеат ойлышо уло: эше ик марий газет кӱлеш мо? Вет тугакшат марий йылме дене лудшо уке, «Ямде лий» ден «Марий коммуна» газет-влакын тиражышт иземын. Кугу Октябрь революций деч вара марий-влаклан могай гына тӱрлӧ газет лектын шоген огыл: «Йошкар кече», «Совет умыландарымаш» да молат. Тиражшат нунын пычырик веле лийын. Но тунамсе правительстве чын умылен: вуй орган-влаклан калык дене шочмо йылме гоч мутланыман. Адакшым пытартыш 40-50 ийлаште виктарыме политикымат мондыман огыл. Вет марий-влак шочмо йылмыштым монденыт манын, тӱрлӧ тӧра кузе гына ышт тырше: школлаште шочмо йылме урокым петырышт… Кажне марий еҥ шочмо йылмыж деч ынже вожыл манын,
тудлан ынде тунар талукак мӧҥгешла ойлаш кӱлеш: «Тый марий улат. Ош тӱняшке марий лийын шочынат. Кугешне марий улмет дене». Тиде пашам «Кугарня» газет шке ончылныжо эн тӱҥлан шотла.

Фотом marpravda.ru сайт гыч налме.