Какшанмучаш селасе библиотекыш пурымо годым книга пушым иканаште шижат. Ала-молан тиде пуш йоча годсо пагытыш пӧртылта. Содыки кызытсе саманыште книгагудыш шагал годым коштына, утларакшым келшыше сылнымутым интернетыште кычалын лудына. Тений библиотеке 155 ияш лӱмгечыжым палемда.
Мемнам библиотекарь Галина Геннадьевна Ягодарова вашлие. Ӱдырамаш 1990 ий годсек йоча-влакым лудаш кумылаҥда. Ончыч тудо Кремлёнки ялысе библиотекыште пашам ыштен, а 2008 ий январь годсек – Какшанмучаш селасе книгагудышто.
– Книгам изинек лудаш йӧратем. Авамак библиотекарь лияш темлен. Тыге И.С.Палантай лӱмеш училищыште (кызыт тӱвыра да сымыктыш колледж) библиотеке паша специальностьлан тунемынам, – ойла Г.Ягодарова.
Йӧратыме книга шотышто ойлаш гын, тыгайже Галина Геннадьевнан уке. Йоча годым ик сынан книгам лудын, кугурак лиймеке, весым. Кызыт куштылго прозо жанрыште возымо произведенийым утларак ойыра.
Какшанмучаш библиотекыште 9218 книга аралалтеш. Кажне ийын библиотекылан 20-30 у книгам пуат. Тидыже Г.Ягодарован мутшо почеш шагал. Фонд тошто. Кызыт эн тошто книга-влак 1950-ше ийлаште савыкталтше улыт. «Чот тошто книга-влакым пайдаланыме радам гыч луктына, макулатурыш колтена», – манеш библиотекарь.
Библиотеке пелен йочасадыш коштшо йоча-влаклан «Росток», 7-ше классыште тунемше-шамычлан «Фантазеры» да пенсионер-влаклан «Вечная молодость» клуб-влак пашам ыштат. Книгам изижге-кугужге лудаш йӧратат. Г.Ягодарова каласкала:
– Йоча-влак тышке тӱрлӧ журналым ончалаш, домино, шашке дене модаш толыт. Кугурак ийготан-влак кокла гыч Галина Ивановна Дубникова иканаште 20 книгам лудаш налеш. Ик кечат книга деч посна ом керт манын ойла. Таисия Аркадьевна Рукавишникова марла книгам веле лудеш, шкежат оксала наледа. Библиотекыште улшо чыла марла книгам лудын пытарен, садлан кызыт мемнан деке ок кошт. А рушла ом умыло веле ойла.
Тугеже Какшанмучаш библиотекын фондшо у да марий книга-влак дене утларак пойдаралтеш гын, могай сай лиеш.