Сеткым пидше, окопысо сортам ыштыше еҥ-влак СВО-што кредалше салтак-влакын илышыштым арален кодаш полшат манын ӱшанат. Ты шонымаш дене Советский район Михайловка ялысе книгагудо пелен «Мудрое поколение» клуб чумырген.
Кертме семын полшат
– Ты пашам ынде ятыр жап ыштена. Советский районыш парафиным кондат, вара йодмо почеш тудым шеледат. Окопысо сортам ышташ манын, шуко калай ате кӱлеш. Тиде амал дене ял калык деч кӧн мыняр уло кондаш йодынна. Пӱнчӧ пӱгыльмым шке погенна, тыгак школышто тунемше-влак кок мешакым пуэныт. Калай атыш коштымо пӱгыльмым оптена, вара парафиным левыктен темена.
Ты клубышто шукынжо ийготан еҥ-влак улыт. Эр гыч кас марте тыршат, каныш кечынат погынат. Пашам шеледат: иктышт сортам ыштат, весышт сеткым пидыт. Ялысе чолга пӧръеҥ Сергей Михайлович Морозов мыланна сеткым ышташ лентым пӱчкедыме станокым йӧныштарен, ынде ты паша куштылгыракын кая, – ойла Михайловка книгагудым вуйлатыше С.В.Моторова.
Ондак чолга еҥ-влак мыняр сеткым пидмыштым да окопысо сортам ыштымыштым шотлен огытыл. Октябрь кыдалне гына тидлан тӱткышым ойыреныт.
Тачысе кечылан нуно 554 окопысо сортам ямдыленыт да 26 сеткым пидиныт.
Михайловка книгагудын ВК-се тӱшкаж гыч налме фото.