Козьмодемьянск оласе Самырык техник станцийыште пашам ыштыше Т.Е.Блинован кидпашажым ужат гын, тыглаяк эртен каен от керт. Сӧрал шӱешпидышыжым налын, моторланен пижыктен коштмо шуэш. Кидшолжат, вуйыш пижыкташ сӧрастарышыжат я пылышыш сакалташ ыштыме кӧржшат, моло арвержат куандарыше.
Татьяна Евгеньевна – ешартыш образованийын педагогшо. Шерым пидме сомыллан йоча-влакым 25 ий туныкта. Шкежат ойыртемалтше пашаже-влакым ончерыш кумылын луктеш. Тений Медведево районысо историко-художественный тоштерын эртарыме «Руками женщин» конкурсышто икымше верым налын.
Т.Е.Блинова славян калыкын оҥеш сакыме арвержым – герданым – уло кумылын ышта да ужалаш луктеда. Тидын нерген шкеже тыгерак каласкалыш:
– Ме герданым, тыгак брошкым да молымат ӱдырем дене пырля ыштылына. А такшым мыняр йочам тыгай пашалан шӱмаҥденам – каласашат неле. Кызыт «Волшебный бисер» ден «Чудесный бисер» кружоклашке 100 утла икшыве коштеш. Ача-авашт тышке кондыштарымылан оксам огыт тӱлӧ – тыгайже тенийысе илышыште пеш шуэн вашлиялтеш.
Йоча-шамычлан объёмный манме фигурко-влакым ышташ келша. Нунын арверыштым тӱрлӧ конкурсышто призовой верла дене эре палемдат. Икмынярынже кеҥежым Юл эҥер мучко ийын волышо теплоход дене толшо турист-влаклан шке кидпашаштым ужалаш коштыт. Уна-шамычат йывыртат, а икшыве-влаклан – кок пачаш кугу куан.
Шер гыч Т.Е.Блинова ӱдырамаш-влаклан ятыр сӧрастарышым ямдыла. Тыгак пеледышым, кугече муным, шергашым да молымат ышташ туныкта.
– Ме йоча-влакым моторлыклан кумылаҥден куштена. Вет кид дене ыштыме паша уш-акылланат да сымыктыш тӱням ужаш полша. Тыгак айдемын кидпашалан талантше улмым рашемдена. Мыйын шонымаште, шер гыч мотор арвер нигунамат модо гыч ок лек. Сандене ончыкыжымат шер дене пашам ышташ тӱҥалына да шуко сӧрал арверым шочыктена, шонем.
Арвер-влакым шарен оптымо ӱстембалже воктене шогымо годым икмыняр ача-ава, эртен кайыше тыглай еҥ-влак кидпашажым аклышт, сай туныктышо манын мокталтышт. Поро мутым колаш – путырак кугу ак.