21 мартыште Йошкар-Олаште Российысе инвалид обществын Марий Элысе пӧлкаже СВО участник ден начар тазалыкан еҥ-влаклан Путешественник-влак клубым почын.
Тидым ышташ Президент грант фондышто «Доступный туризм» проектын сеҥымыже полшен.
Ты шотышто вашлиймашым ВОИ МРО-м вуйлатыше Наталья Богомолова почын. Проект почеш Путешественник-влакын клубышт 5 культурно-исторический объект дене палыме лиеш. Тыге еҥ-влак Марий Элыште веле огыл ончат, тыгак Татарстаныш, Чувашийыш, Виче ден Угарман кундемлаш миен коштыт. Нуно тушто ик кече, а южо вере кок кече лийыт. Лишыл жапыште Озаҥыш каят, тусо Кремльым, мечетьым да моло верымат ужын толыт.