Ик кеҥежым йолташем-влак дене эҥер воктек каналташ каенна. Миен шумекына, тораште огыл палаткым, воктеныжак илалшырак пӧръеҥым ужна. Икмыняр жап гыч палыме лийна, кечывал кочкышым пырля ышташ ӱжна. Михаил мыланна тиде верым йӧратымыж, тышке кажне кеҥежым толмыж нерген каласкалыш.
Вара тудо мыйым умдыр-влакын илыме верыштым ончалаш ӱжӧ. Корнышто ме мландыште кийыше пушеҥгым ужна. «Теве ала-кӧ пушеҥгым руэн йӧрыктен. А веет тудым амал деч посна руаш огеш лий», — келгын шӱлалтен каласыш Михаил. «Молан?» — йодым мый. «Пушеҥге наказатлен кертеш. Пушенгым руымо деч ончыч мый тудын деч проститлаш йодам. Такше пушеҥгым руымашыжат уке, тулым ылыжташ кукшо уалам кычалам», — вашештыш пӧръеҥ. Тыге ойлымыжо мыланем оҥайын чучо, умбакыже каласкалаш йодым.
Михаил тыгайрак историйым ойлыш: «Икана изам дене тышке телым толынна. Игече пеш йӱштӧ ыле.Мыланна пу ситен огыл. Палаткем воктене пӱнчым ужым да йӱкын пелештышым: «Ончо, могай сай пӱнчӧ. Айда ме тудым эрла руалына, пу шуко жаплан сита. Ох, а пӱгыльмыжӧ мыняр! Самрварлан поген каена». Эрлашыжым эрдене, мален кынелмек, палаткем гыч лектым да ӧрынат колтышым: лумым пуйто пӱгыльмӧ гыч ыштыме шартыш дене леведме. Вуем кӱш нӧлтальым да ужым – пӱнчын ужар вуйжо чараҥын. Тунам тудо пуйто каласыш мылам: «Погыза пӱгыльмем, темза! Тольык ид ару, илышем арален кодыза». Тунам мый умыленам: пушеҥге-влак илыше улыт гына огыл, нуно ойлымынам колыт, чыла умылат, энергийыштым мыланна пуат. Тидым мый чодыра гыч мӧҥгӧ, вийым поген толмекем, эшеат сайын шижам».
Анатолий С., Йошкар-Ола