Шошо толмо дене озавате-влак пакчалан росотам ямдылаш тӱрлӧ нӧшмым ӱдаш тӱҥалыт. Кунам тидым ышташ сайрак? Тыгодым мом шотыш налман? Йодыш-влаклан вашмутым Российысе ялозанлык рӱдерын Марий Элысе филиалжын Морко районысо пӧлкажын вӱдышӧ агрономжо И.С.Тимофеева пуа.
Ирина Семёновна Морко посёлкышто ила. Пакчаштыже тӱрлӧ пакчасаскам, кушкылым, пеледышым, ятыр урлык пареҥгым шында. Мутлан, у урлык пареҥгым кажне ийын кушта да тудын кузе кушмыжым, вияҥмыжым да лектышыжым шымлаш йӧрата. Ирина Семёновнан ойлымыж почеш, моло дене таҥастарымаште «Фазан» да «Тулеевский» пареҥге урлык-влак тамлырак улыт.
Шере пурыс
Февральын пытартыш декадыштыже шере пурысым ӱдыман. Мландыш кусарен шындыме жаплан тудо 50-65 кечаш лийшаш. Пурыс нӧшмӧ вашке шытыже манын, ӱдымӧ деч ончыч «Эпин» биостимулятор вартышыште инструкций почеш кучаш келшен толеш. Шытыше нӧшмым ӱдымӧ годым пӧлемыште 25 градус наре шокшо лийшаш. Пурыс йӱштым, южйолым, уто вӱдыжгым ок йӧрате. Садлан вӱдым чӱчкыдын шавыман огыл. Вӱд леве лийшаш.
Баклажан
Ты пакчасаска нӧшмым февраль кыдалне ӱдаш келшен толеш. Йыраҥыш кусарыме годым росота 65-75 кечаш лийшаш. Баклажан нӧшмым ик сантиметр келгытыш ӱдыман. Ӱдымӧ деч ончыч «Циркон» але «Эпин» биостимулятор вартышым кучылташ келшен толеш. Нӧшмӧ сайын шытен лекше манын, пӧлемыште 25 градус шокшым кучыман. Тунам нӧшмӧ 8-10 кече гыч лектеш.
Помидор
Февраль мучаште вараш шушо помидорым ӱдат. Нӧшмым 1-1,5 сантиметр келгытыш урыман. Тудо сайын шытен лекше манын, пӧлемыште 20-25 градус шокшо лийшаш.
Февральыште порей шоганым, сельдерейым (вожаным), снегым, тыгак лаванде, «Шабо» гвоздике, бегоний, петуний, виола пеледышым ӱдаш жап.
Шотыш налман!
Чыла гаяк росота волгыдым йӧрата. Пычкемышыште тудо вичкыж да кужу йолан лиеш.
Росота начарын кушкеш гын, шытен лекмыж деч вара лу кече эртымеке, ӱяҥдышым пуыман. Тидланже «Гумат+7», «Солар старт», «Акварин» удобрений-влакым инструкций почеш кучылташ сай.
Кушкыл пеҥгыде лийже манын, фитолампым чӱкташ йӧнан.
Росота ынже шуйно манын, ӱдымеке, яшлыкым плёнко дене петырыман. Пӧлемысе температурым эреак эскерыман – 20-25 градус деч юалге лийшаш огыл. Росота шытен лектын гын, тудым 15-17 градусан верыш кораҥдыман. Шавышаш вӱд пӧлемысе гай температуран лийшаш. Росотан кок лышташыже лектын гын, тудым вес яшлыкыш кусарыман. Тыгодым пӧлемыште 20-23 градус деч йӱштӧ лийшаш огыл.
Росотан лышташыже шемалге-канде тӱсым налме пӧлемыште юалге манмым шижтара. Тыгодым фосфоран ӱяҥдышым пуыман да шокшырак верыш кораҥден шындыман. Леве вӱдым веле оптыман. Тылеч варат росота начарын кушкеш гын, монофосфат калий ( 5 л вӱдлан 5 г калий) вартышым шавыман. Тидым эрдене ышташ йӧнанрак.
Могай сайрак?
Кызыт пазарыште, кевытыште моткоч шуко нӧшмым ужалат. Ирина Семёновна Киров областьысе «Агросемтос» фирмын нӧшмыжӧ-влак мемнан кундемлан келшыше улыт манын палдарыш. Шере пурыс кокла гыч Снегирёк, Пламенный, Веснушка, Золотинка урлыкым палемдыш. Помидорым гын Энерго, Хлыновский, Семейный, Барон, Аскет, Корнет урлык сай улыт. А кияр – Чебоксарец, Герман, Маша, Кибрия.
Нӧшмым налме годым пачкыште F1 возыманым ойырыман.
И.Тимофееван альбомжо гыч налме фото-влак.