1 апрельыште МОСИ-ште Педагог-психолог-влакын республикысе форумышт икымше гана эртаралтын. Тудо Туныктышын да наставникын идалыкшылан пӧлеклалтын.
Тышке республикна гыч 150 утла педагог-психолог толын. Пленарный заседанийыште Марий Элысе образований да науко министерствын воспитаний да ешартыш образований пӧлкам вуйлатыше О.Д.Шустова, Республикысе наркологий диспансерысе тӱҥ врачын алмаштышыже С.В.Путилова докладым ыштеныт. Тушто ойыртемалтше йоча-влак дене пашам ыштымаш, койышыштым саемдымаш, тунемме вер ден ача-аван кылым кучымаш нерген ойлалтын. Вара участник-влаклан тӱрлӧ теме дене ныл площадке пашам ыштен.