Ий гыч ийыш профсоюз толкын шке пашажым виянрак да виянрак шуктен толеш. Теве Морко кундемыште туныктымо аланысе профсоюз ушем тунемме идалык тӱҥалтыш гычак моткоч шуко мероприятийым эртара.
Вӱдшор тылзын кудымшо кечынже Морко посёлкышто шахмат дене черетан ӱчашымаш лийын. Тушко 13 школ гыч 26 чолга шахматист ушнен.
Морко кундемысе школлаште тыршыше, шахмат дене чолган модшо спортсмен-влакын таҥасымашыштым туныктымо аланысе профсоюз толкыным вуйлатыше В.С.Фёдоров почо. Тӱҥ судьян сомылжым Морко кундемлан палыме еҥ Г.А.Муравьёв ий гыч ийыш шукта. Каласыман: кодшо ийысе таҥасымаш дене таҥастарымаште тений утларак школ гыч ӱчашаш толыныт. Тидыже Валерий Семёнович ден Геннадий Александровичын тыршымыштын сай лектышыж нерген ойла.
Кыдалаш школ-влак коклаште 1-ше вер дене Морко посёлкысо 6-шо №-ан школ палемдалтын. 2-шо верым Зеленогорский школ налын. 3-шо вер Коркатово лицейлан пуалтын. Морко районысо физкультур да спорт рӱдерын, Морко посёлкысо 1-ше ден 2-шо №-ан, Арын да Нуж-Ключ школ-влакынат командышт пеш сайын модыныт.
А тӱҥ школ-влак коклаште Кумыжъял школын командыже сеҥышыш лектын. 2-шо верым Шордӱр школ налын, 3-шо вер дене Купсола ден Шӱргыял школ палемдалтыныт. Кожлаер школынат командыже моткоч чолган модын.
А вӱдшор тылзын латкокымшо кечынже шашке дене профсоюз таҥасымаш лийын. Тушко Морко районысо 13 школ гыч 26 чолга шашист толын. Иктешлымашым ончалаш гын, кыдалаш школ-влакын командышт коклаште 1-ше вер дене Морко районысо физкультур да спорт рӱдер палемдалтын, 2-шо вер дене – Коркатово лицей, 3-шо вер дене – Морко посёлкысо 1-ше ден 2-шо №-ан школ-влак. Зеленогорский, Арын, Морко посёлкысо 6-шо №-ан ден Нуж-Ключ школ-влакын командыштат пеш сайын модыныт. Тӱҥ школ-влак коклаште 1-ше верыш Шӱргыял школын командыже лектын, 2-шо верыш – Шордӱр школ, 3-шо верыш – Кожлаер школ. Кумыжъял ден Купсола школ-влакын командыштат шкеныштым чолган ончыктеныт.
Кажне таҥасыш ончыкылан вий-куатым ешара. Профсоюз – мыланна илыш дене тӧр каяш полшышо тӱҥ эҥертышна. Туныктышо-влакланат шке вий-куатыштым профессионал таҥасымаште тергаш йӧным ышта. Тыгай мероприятий-влакым эртарен шогымыштлан В.С.Фёдоровлан, тӱҥ судья Г.А.Муравьёвлан да чыла участниклан таум ойлена.
Елена Григорьева, Шӱргыял школ пеленысе профсоюз ушем вуйлатыше.
Снимкыште: шашке дене таҥасымаште сеҥыше-влак; шахмат дене модмо годым.