Кодшо ийын сентябрьыште ПГТУ-н шым студентше «Студенческий стартап» конкурсышто ик миллион теҥгеаш грант гыч налын. Ты конкурсым инновацийым илышыш пурташ полшышо фонд эртарен. Шым студент-влак коклаште – марий рвезе Владимир Ефимов. Тудын специальный назначениян техникылан симуляторым ыштыме пашажым кӱкшын акленыт.
Чыла вере чолга
Владимир Политехысе управлений да право факультетыште нылымше курсышто тунемеш. Рвезе Морко район Шеҥше селаште шочын-кушкын. Тысе школышто тунемын, «Юнармий» кружокышто шуаралтын. Тыгак баскетбол, волейбол секцийлаште мастарлыкшым таптен.
– Школ деч вара Волгатехын студентше лийынам. Тыште проект-влакым виктарыме шотышто профессионал шинчымашым нӧлтем. Такшым вес вере тунемаш пураш шоненам, но пӱрымаш мыйым тышке конден. Тидланже ик ганат ӧкынен омыл, мӧҥгешла, проект пашам утларак веле йӧратен шынденам. Ойырен налме профессием шканем моткоч келша.
Студент илыш веселан эрта. Мый чыла вере чолгалыкым ончыкташ тыршем. Мероприятийлашке кумылын ушнем, шкеат ты сомылым вораҥдарымаште тыршем. Кызыт самырык ӱдыр-рвезе-шамычлан тунемме тӧнежлаште шуко йӧн уло. Тӱҥжӧ – ӧрканыман огыл, активист лийман, – каласкала В.Ефимов.
Рвезын чолга койыш-шоктышыжо тудлан тӱрлӧ вере корным почын. Мутлан, «Я в деле», «Студенческие отряды» толкын-шамычлан кӧра тудо шуко ум пален налын, у йолташ-влакым муын. Тидын дене студент илышыжым эшеат сӧрастарен. Ойлымыж почеш, толкын-влакын пашашт нерген чарныде каласкалаш лиеш. Нуно Ефимовын чоныштыжо ӱмырешлан кодыт.
Конкурс ончыко вӱда
Владимирын ончыкылык профессийже проект-влак дене кылдалтын. Садлан студент ты пашам виктарымылан вуйын шога. Шуко проект конкурслаште вийжым терга.
– Конкурс-шамыч ончыко каяш, шонымашке шуаш кумылаҥдат. Нунылан кӧра ончылнем у корно-влак почылтыныт, илышемат вашталтын манын кертам. Кызыт кок проект пашам виктарем: тунемше-шамычым дроным погаш туныктымо клубым почмо да команде дене модаш у модышым ямдылыме шотышто. Вигак каласем: куштылго огыл. Но мый ты паша дене йӱлем, садлан шонымашем илышыш пуртен кертмемлан уло чонем дене ӱшанем, – манеш Владимир.
Рвезын ойлымыж почеш, тудо уло вий-куатшым, ӱнаржым кызыт проект-влакым илышыш шыҥдарымылан виктарен. Ончылно эше ятыр ыштышаш сомыл, но Владимир тидлан ямде. Тугеже Морко рвезылан шонымашкыже шуаш!
Владимирын конкурсышто сеҥыше проектше команде дене модаш йӧнештарыме у симуляторым ямдылымаш. Тидлан 3-4 еҥлан погынен, виртуальный танкым виктарыман. Тудын кӧргыштыжо, чынжымак, такнкысе чыла гаяк арвер да ӱзгар-влак улыт. А модшо-шамыч шкеныштым экипажыште улмышт семынак шижыт. Симулятор дене тунемше да погынен модаш шонышо икмыняр йолташ-влак пайдаланен кертыт.
В.Ефимовын архивше гыч налме фото.