30 ноябрьыште Москошто К.С.Станиславский ден В.И.Немирович-Данченко лӱмеш музыкальный театрын сценыштыже «Душа танца» балетный конкурсышто сеҥыше-влакым палемденыт. Нунын коклаште Марий Эл гыч участник-влак лийыныт.
Тений 16 призым театр туныктышо да ансамбль-влакым ямдылыше туныктышо-влаклан кучыктеныт.
«Рыцарь танца» номинацийыште «Бауман лицейын» генеральный директоржо Григорий Пейсахович палемдалтын.
Концертыште К.С.Станиславский ден В.И.Немирович-Данченко лӱмеш музыкальный театрын, Мариинский Кугу театрын солистше-влак выступатленыт. Тыгак Йошкар-Оласе Э.Сапаев лӱмеш опер да балет театрын артистше-влак Екатерина Байбаева ден Артём Веденкин мастарлыкыштым ончыктеныт. Нуно «Восходящая звезда» номинацийыште палемдалтыныт.
«Душа танца» призым ышташ Российысе тӱвыра министерстве да «Балет» журнал 1994 ийыште шонен луктыныт. Тудым кажне ийын хореограф, педагог, композитор, дирижёр, художник-влаклан пуат. Тыгак сымыктыш алан нерген материалым ямдылыше журналист-влакымат палемдат.