Коронавирус ваштареш вакциным виеш ыштыктен кертыт мо?
Тидын нерген Юрист Алексей Инородцев умылтара:
– Еҥ-влаклан медполышым яра пуымо кугыжаныш гарантий программын ик ужашыже – профилактике прививкым ышташ права. Прививке-влакым еҥ-влаклан южо инфекций чер ылыжме лӱдыкшӧ годымат ыштат.
2020 ий 27 декабрьыште РФ Минздравын приказше почеш Эпидемий показаний почеш эртарыме профилактике прививке календарьыш коронавирус ваштарешат прививкым пуртымо. Туштак вакцинацийым обязательно ыштышаш еҥ-влак тӱшкам ончыктымо (3 уровень почеш):
Эн ончыч ыштышаш улыт – медицине, образований, социальный обслуживаний организацийлаште, шуко функциян рӱдерлаште ыштыше еҥ-влак да молат.
Вара – транспорт да энергетике организацийлаште, правоохранительный органлаште ыштыше-влак да молат.
Кумшо тӱшка – кугыжаныш гражданский да муниципальный служащий, профессиональный да кӱшыл образовательный организацийлаште 18 ияш деч кугурак тунемше, призывник-влак.
Прививке календарьыште «обязательный вакцинаций» термин кучылталтеш гынат, «Об иммунопрофилактике инфекционных болезней» федеральный законын (1998 ий 17 сентябрьыште лукмо) 5-ше статьяжын 1-ше пунктшын 8-ше абзацыштыже ончыктымо почеш еҥын прививке деч отказатлалташ праваже уло. Тидын нерген кагазеш возыман.
2021 ий 18 январьыште калыклан коронавирус ваштареш вакциным ыштыме темылан пӧлеклалтше брифингыште РФ Правительствын вице-премьерже Т.А.Голикова вакциным шке кумылын ыштыме нерген каласен. Тыгак возымо медицине тӧнежлашке колтымо Россий Минздравын 2021 ий 15 январьысе серышыштыже.
Тыгодымак прививкым ыштш огыл гын, икмыняр чарак лектын кертеш. Мутлан, южо элышке каяш прививкым обязательно ыштыман. Инфекций чот шарлыме але эпидемий лийын кертме лӱдыкшӧ лекме годым образовательный да тазаҥдыме тӧнежлаш жаплан огыт нал. Паша инфекций чер дене черланен кертме лӱдыкшӧ дене кылдалтын гын, пашаш налде але паша гыч кораҥден кертыт (157-ше №-ан федеральный законын 5-ше статьяжын 2-шо пунктшо).
Тыгай паша переченьым РФ Правительствын 1999 ий 15 июльышто лукмо 825-ше №-ан пунчалыштыже ончыктымо. Тиде, мутлан, образовательный, инфекциян черан еҥ-влак дене кылдалтше паша. Айдеме ты переченьыш пурталтше пашам шукта гын, тазалык шотышто эҥгек уке годым прививкым ыштыктышаш. Прививке уке гын, пашаеҥым паша гыч кораҥден кертыт. Ты жапыште пашадар огеш тӱлалт (РФ Паша кодексын 76-шо статьяже).