Тул азап деч шекланыме шот дене 27 апрель гыч 12 май марте республикыштына пожар ваштареш кучедалме режимым увертарыме. Марий Эл Республикын граждан обороно да калыкым аралыме шотышто комитетше шижтара: тиде жапыште чодыраш пураш огеш лий. Тыгак кудывечыште, пакчаште але моло оралте пелен тулым ылыжташ, куштырам, кукшо шудым йÿлалташ огеш лий. Яндар южышто кочкышым ямдылаш (шашлыкым жаритлаш) чарыме.
Ушештарена: 2020 ийыште Марий Элыште 384 пожар лийын, тушеч кокытышто – чодыраште, 1,1 гектар кумдыкышто пӱртӱс поянлык йÿлен. Тулышто 9 еҥ колен. 38775 тÿжем теҥгелан эҥгек ышталтын.
Тидымат ида мондо: пожар деч аралатме правилым пудыртышо-влаклан административный штрафым пуэн кертыт. Тыглай еҥ-влаклан 2000-4000 тӳжем теҥгем тӱлаш логалеш, а должностной лица-влаклан – 15-30 тӳжемым. Предприниматель-влак (кӧ юрлицо семын возалтын огыл гын) – 30-40 тӳжем теҥгем, а юридический лицалан – 200-400 тÿжем теҥгем тӳлыктат.
Еҥын титакшылан кӧра пожар лиеш гын, эҥгек кугытым шотыш налын, титаканым уголовно мут кучаш шогалтен кертыт.
Шарныза: ончылгоч шекланен гына туткар деч аралалташ лиеш!