Чыла пашаже калык дене кылдалтын
Звенигово район Эсмекпляк селан ӱдыржӧ, «Марий Сату» онлайн-кевытым почшо Наталья Венинам кундемыштына шукын марий йылме дене онлайн курсым эртарыше чолгаеҥ семын палат.
Наталья 2014 ийыште, тунам эше тудо МарГУ-н студенткыже лийын, марий йылме дене курсым эртараш тӱҥалын, варажым пашажым онлайн-форматыш кусарен.
– Онлайн курсышто икымше тунемшем Америкыште илыше пӧръеҥ лийын. Тудо национальность дене кӧ улмыжым раш пален огыл. Коваже мордва ӱдырамаш лиймыла чучеш манын ойлен. «Небесные жёны луговых мари» фильмыште актрисе Любовь Купсольцеван мурыжым колмеке, марий йылмым тунемаш кумылаҥын.
А 2020 ийыште марий йылме, историй, тӱвыра, литератур дене кылдалтше видеоурок-лекций-влакым ямдылаш тӱҥалынам. Лекцийым палыме учёный, шымлызе-влак лудыт, – ойла Наталья.
Н.Венина 2020 ий мучаште шкешотан марий календарь-влакым савыкташ кумылаҥеш. Наташалан типографийыште календарьым печатьыш колташ огыт кӧнӧ, вараш кодын улыда маныт. Но самырык ӱдыр вуйым ок саке, кӱлеш оборудований-влакым налеш да календарьым шке печатлен луктеш. Тений курымашлык календарьым ямдылен.
Чыла тидым Н.Венинан «Марий сату» онлайн-кевытыштыже налаш лиеш.
– Тушто мыйын темлыме сатум веле огыл ойыраш лиеш, тыгак моло кидмастарын пашашт ончыкталтыныт, – палдарыш амалкалче.
Марий шӱлышан самырык ӱдырамаш калыкшым йӧрата. Йылмым, тӱвырам арален кодымаште чот тырша. 10 тылзаш изи ӱдыржӧ денат марла веле мутлана.