Республикысе 3-шо №-ан исправительный колонийысе судитлыме 15 еҥ «Повар» специальностьым налын. Нунын кокла гыч кумытшылан иканаште нылымше разрядым пуэныт.
Кум тылзе жапыште занятий-влакым производственный обученийын мастерже Эльвира Глухарева вӱден. Общепитын 33 ий паша стажан технологшо шке тунемшыже-влаклан ятыр профессиональный секретшым каласкален. Ты тунемме ийыште ФСИН-ын Марий Элысе управленийжын профессиональный училищылаштыже 60 наре дипломированный поварым ямдылен шуктышаш улыт. Э.Глухаревам кызытеш у тунемше-влак — Йошкар-Оласе следственный изоляторышто шинчыше-влак — вучат.