Март тӱҥалтыште Мишкан селаште «Саскавий» моторлык конкурс лийын. Тушко Калтаса, Балтач, Краснокам, Нуриман да Мишкан районла гыч индеш марий ӱдыр ушнен. Гран-прим Элина Матвеева сеҥен налын.
Элина Пошкырт кундем Калтаса селасе 1-ше номеран школышто 10-шо классыште тунемеш. Чолга ӱдыр школышто да районышто эртаралтше ятыр мероприятийыште шкенжым терга.
Чулым да чолга
– Активист улам. Мурымо, куштымо конкурслашке, театральный постановкылашке, поро кумылым ончыктымо мероприятийлашке кумылын ушнем, – манеш Э.Матвеева.
«Саскавий» конкурс нерген ӱдырын аваже (мурызо да тӱвыра пашаеҥ Лилия Матвеева) пален налын. Тудо интернетысе соцкылыште уверым ужын да Элиналан тушко ушнаш темлен. Конкурслан визиткым ямдылаш кӱлын. Ӱдыр-влак тыгак шке кидпашаштым изирак ончерыш чумыреныт. Вес этаплаште марий ӱдыр-влакын усталыкыштым да уш-акылыштым тергеныт. Марий калыкын историйже ден йӱлажымат сайын палаш кӱлын. Жюри тыгак ӱдыр-влакын калык кочкышым ямдылымыштым терген. Мӧҥгылан пуымо паша «Илышемын ик кечыже» маналтын.
– Эрдене школыш вашкем. Урок деч вара усталык шӱлышан мероприятий-влак эртаралтыт, эше поро кумылым ончыктымо сомыл-влакым ыштем. Школыштына «Вместе мы сила!» самырык-влаклан волонтёр клубым почынам. Школ деч вара районысо самырык-влак дене паша шотышто комитетыш каем, тушто волонтёр да активист улам.
Селасе тӱвыра пӧртыш мураш коштам. Шкетынат, «Солнечные лучики» ансамбльыштат мурем. Авам ты тӱвыра пӧртыштӧ методистлан пашам ышта, «Солнечные лучики» йоча вокальный ансамбльым вуйлата. Тыгак «Сюрприз!» йоча образцовый театр-студийыште вӱдышӧ актрисе улам да режиссёр-постановщиклан полышкалем. А кастене мӧҥгӧ пашам ыштем да авамлан полшем. Теве тыгерак мыйын ик кечем эрта, – каласкала Э.Матвеева.
Конкурслан Элина кӱлынак ямдылалтын. Мӧҥгыштыжӧ аваж дене коктын ятыр материалым шергалыныт. Марий йӱла да тӱвыра нерген пален налаш ӱдыр верысе краеведческий тоштерыш коштын. Визиткым ямдылымаште ӱдырлан кокаже – поэтессе Алевтина Баязитова – полшен, визиткым почеламут семын келыштарен.
Вӱдышӧ лийнеже
Яра жапыште Элина алмазный вышивке дене шинчылтеш. Тыгак марий тӱрым тӱрлаш йӧрата, бисер дене сӧрастарыш-влакым ямдыла. Нине кидпашаже-влакым конкурсыш аклаш луктын. Тудын ешыштыже коважат, аважат мелнам чӱчкыдын кӱэштыт, ӱдырат нунын деч тидлан тунемеш. Калык кочкыш дене палдарыме этапыш Э.Матвеева мелна ден оварчыкым (тувыртышым) намиен.
Жапше лийме годым Э.Матвеева книгам лудеш. Эше сценарийым возаш шинчеш, тудлан мероприятий-влакым вӱдаш келша. Шукерте огыл аважын лӱмгечыжым шкеак вӱден.
– Марий улмем дене кугешнем. Калык ила гын, йылмыжат илаш тӱҥалеш, шонем, – манеш тудо.
Вес ийын Элина школым шӧртньӧ медаль дене тунем пытараш да ойырен налме вузыш тунемаш пураш шона. Йӧратыме сомылжымат ынеж кудалте – мероприятий-влакым вӱдышӧ лийнеже.
Э.Матвееван альбомжо гыч налме фото.