Киров кундемысе Вӱрзым район Байса тӱвыра пӧртыштӧ кызыт кум пашаеҥ уло. Нуно чыла пашам пырля кутырен ыштат. Тӱвыра пӧртым Людмила Николаевна Тарасова вуйлата. 1999 ий годсек Альбина Фёдоровна Кузнецова культорганизаторлан да «Поса кундем» ансамбльын художественный вуйлатышыжлан ышта. Йоча-влак дене Зинаида Романовна Петрова заниматла. Тудо икшыве-шамычлан марий да руш муро-влакым туныкта.
2008 ий годсек Байса селаште композитор Д.М.Кульшетов лӱмеш «Ӱмыр мучко муро дене» фестиваль эртаралтеш. Тушто самодеятельный калык коллектив-влак выступатлат. А ты мероприятийлан композиторын эргыже Валерий Кульшетов вуйын шога.
1989 ийыште художественный самодеятельный коллективым ыштеныт. Тудым П.Н.Ямбаршев ден А.Л.Антонова чумыреныт. Ик жап гыч тӱвыра пӧртым Маргарита Ивановна Ямбаршева вуйлаташ тӱҥалын. Тудо 1996-2008 ийлаште пашам ыштен. Нуно кызытат сценышке лектыт.
«Эн ончыч ансамбльнан лӱмжӧ «Ял шӱлыш» ыле. Композитор Дмитрий Кульшетов толын да ансамбльлан «Поса кундем» лӱмым пуаш темлен. Тыгак ыштенна. 1993 ийыште коллективланна калык лӱмым пуэныт. Кок гана тудым араленна. Кызыт пӧръеҥ-влак шагалын кодыныт, торашке пашаш кудалыштыт, а самырык-влак тунемаш каят, тунемше-шамыч шагалын улыт. Ансамбльын составше ок вашталт, ондак кӧмыт коштыныт гын, нунак улыт. Мураш да кушташ йӧратыше-влак радамыште вате-марий Ямбаршевмыт, Кузнецовмыт, Зоя Фадеева эре лийыныт. А теве 80 ийыш тошкалше Лидия Ерофеевна Мальцева ансамбльышке 20 ий коштеш», – манеш Альбина Фёдоровна.
Кодшо ийын августышто «Поса кундем» ансамбль 30 ияш лӱмгечыжым палемден. Тидын лӱмеш Поса тӱвыра пӧртыштӧ, Лебяжский, Пижан районлаште, Уржум олаште кугу концертым ончыктен. Ансамбль Угарман кундемыште, Марий Турек район Сысоево ялыште ӱжмӧ почеш выступатлен.
«Поса кундем» коллектив кажне концертыште шке Вӱрзым марий-влакын семыштым, куштымашыштым ончыкташ тырша. Репертуарыштыже «Шудо солымаште» куштымаш, Кортымбал ял вел такмак-влак да молат улыт.