Чулым еш
25 ноябрьыште Аван кечыже вашеш Йошкар-Олаште «За всё тебя благодарю» кугу пайрем концерт лийын. Тудым Российысе ӱдырамаш-влакын ушемышт ямдылен. Ава-влакым Кугыжаныш Погын председательын алмаштышыже, социально вияҥмаш комитетын председательже Наталья Козлова саламлаш толын. Тудо ӱдырамаш-влакым тӱнямбалне эн кӱлешан, поро пашам шуктымыштлан – икшывым ыштен, ончен куштымыштлан да воспитатлымыштлан – тауштен.
Пайрем годым «Я – Мама» фотоконкурсышто сеҥыше-влакым палемденыт, «Семья – основа мира» проектым презентоватленыт. А Морко посёлкышто илыше Семёновмыт ешым «Единый Россий» партийын регионысо пӧлкажын диплом дене «Марий Элын эн чулым ешыже» номинацийыште палемденыт.
Наталия ден Виталий Семёновмытын ешышт Морко посёлкышто ила. Ача ден авам ныл икшыве куандара: кок ӱдыр да кок эрге. Кугурак ӱдырышт Ксения Чуваший Республикысе кугыжаныш университетыште врачлан тунемеш. Анастасия 9-ше классыште шинчымашым пога. Ончыкыжым МЧС дене кылдалтше профессийым налаш шона. Матвей 9 ияш, кумшо классыште тунемеш. Футбол дене модеш, бассейныште шуаралтеш. Гордей 6 ияш, йочасадыш коштеш. Ака-изаже семынак жапым пайдалын эртараш тырша. Тудо тӱрлӧ куштымаш да иймаш дене заниматла.
Наталия Валерьевна – профессийже дене педагог. Школыштат, йочасадыштат пашам ыштен. Кызыт Морко посёлкысо 1-ше номеран школ пеленысе «Радуга» волонтёр отрядым вуйлата. Ты ӱдырамаш тӱрлӧ мероприятийым организоватлаш да эртараш кумылан. Пелашыже Виталий Владимирович еҥ коклаште лияш огеш йӧрате, но моткоч поро пӧръеҥ. Еҥ-влаклан полшаш кеч-кунамат кумылан.
Семёновмыт жапым еш дене эртараш йӧратат. Чылан пырля бассейныш коштыт. Каныш, пайрем кечылаште, шкешт гаяк чолга да поро кумылан еҥ-влак дене вашлийын, тӱрлӧ мероприятийым, пайремым эртарат. Поҥго погаш, пӱртӱсыштӧ тыглай каналташ, иктаж спорт модмаш дене модаш погынат. Тидланже нуно лӱмынак Морко посёлкышто икоян, чолга еш-влаклан «От сердца к сердцу» клубым чумыреныт. Арнялан ик гана погынат. Тылеч посна тӱрлӧ сомыллан вашла полшат. Мутлан, пареҥгым луктыт але шындат.
Ик тукым гыч весышке
Семёновмытлан поро пашам шуктымаш – икымше верыште. Нуно изинек тыге воспитатлалтыныт. Тений октябрьыште нуно икшывышт-влак дене пырля доброволец еш-влакын форумыштышт лийыныт. А ӱмаште еш лагерьын шинчымаш слётыштыштыжо участвоватленыт. Вич кече жапыште «Медведица» каныме базыште поро паша тематике дене тӱрлӧ площадкыште шуаралтыныт. Тыште творческий мастерской, социальный проект пашам вияҥдаш полшымо шотышто мастер-класс, еш дене пашам ыштыше психолог дене вашлиймаш, экскурсий, тӱвыра да спорт мероприятий-влакымат палемдыман. Специалист-влак дене пырля пашам шуктымаш кугыеҥ ден икшыве-влаклан поснак пайдам пуа. Тыге изинекак порылыклан тунемат, ешын эн шерге улмыжым умылет.
– Форумын программыже моткоч сай лийын. Икшыве-влак дене жапым пайдалын эртаренна. Тиде мыланна моткоч кӱлешан, шкешотан опыт. Ме шуко ум пален налынна, йочана-шамычлан тӱнян тӱрлӧ тӱсан лийын кертмыжым ончыктенна. Тылеч посна у йолташ-влакым муынна, – палдарыш Наталия Валерьевна.
– 4 гыч 8 декабрь марте Москошто #МыВместе тӱнямбал форум эрташ тӱҥалеш. Тушко логалаш манын, мый Добро.ру сайтыште йодмашым колтенам. Кӱлеш ойырымашым эртен, республикысе делегацийын командышкыже логалынам. Ынде мыят нунын дене пырля ты форумышто лиям. #МыВместе тӱнямбал форумын тӱҥ шонымашыже – элыштына илышым саемдымаш верч тыршымаш. Тидланже ура чонан, поро кумылан, илышым саемдаш полшаш кумылан лидер-влак дене тӱрлӧ ушемым чумыраш да моло сомылымат шукташ кӱлеш, – умбакыже мутланымашым шуйыш Н.Семёнова.
«Поро пашам те кузе умыледа? Тыгай сомыллан еҥ-влакым кузе ойырат?» йодым Наталия Валерьевна деч. Тудо тыгерак мане:
– Порылык мыланем кече дене иктак. Тудын дене илышым, лишыл еҥ-влакым волгалтараш да ырыкташ лиеш. Тидын шотышто мыланем Жан Жак Руссон ойлымыжо моткоч келша: «Еҥын ыштыме порылыкшо ӱмырешлан чонышко шыҥа. Тидлан кӧра илышын кӱлешлыкшым шижат да тудым саемдаш тыршет». Садланак, очыни, порылыкын вийже нимучашдыме. Вет тидлан мемнам ончыч ача-авана туныктат, вара ме – шке икшывына-влакым. Нуныжо шкеныштын йочаштым порылыклан кумылаҥдат. Тыге ешын йӱлаже ик тукым гыч весышке кусна.
Семёновмыт кеч-куштат, моткоч чолга да чулым улыт. Нуно тӱнямбал, Россий, регион кӱкшытан тӱрлӧ таҥасымашке да поро кумылан акцийышке кумылын ушнат. Тидын дене пошкудыштым, йолташыштым да мом каласаш, шке шочмо-кундемыштым чапландарат. Тӱрлӧ кӱкшытан наградыштым да сеҥымашыштым шотленат от пытаре. Тӱҥжӧ – тидым нуно шӱм-чон гоч колтат, моло еҥ-влакымат поро пашалан кумылаҥдат. Тыгай еш-влак мыланна эреак пример улыт! Поро пашаланда тау, пагалыме Наталия ден Виталий!
«Шӱм гыч шӱмыш»
Морко посёлкышто «От сердца к сердцу» еш клуб пашам ышта. Ты клубышто ешыште тыныслык, йӧратымаш да вашумылымаш верч тыршат. Кеч-могай ситуаций годымат икте-весе кокласе кылым пеҥгыдемдыман, кӱлеш годым полыш кидым шуялтыман. Тидланак икшыве-влакымат кумылаҥдат. Тылеч посна йоча-влакым интеллектуально, духовно, морально да физически воспитатлымылан кугу тӱткышым ойырат. Тӱрлӧ конкурслан ямдылат, яра жапым пайдалын эртараш туныктат.
Форум поро пашалан кумылаҥда
Тений доброволец еш-влакым форум Куяр посёлкысо «Авангард» рӱдерыште чумырен. Тушко кундемнан 16 ешыже толын. Кажне еш поро пашам шуктымо да тудым вияҥден колтымо шотышто шке ойжым темлен. Еш-влаклан тӱрлӧ площадкыште вияҥаш йӧн лийын. Тылеч посна оҥай да пайдале мастер-класс, экскурсий да образовательный программе-влак, волонтёр-влак дене вашлиймаш эртаралтыныт.
Семёновмытым да эше ныл ешым Йошкар-Оласе пырыс-влаклан келыштаралтше «Успех» приютыш намиен коштыктеныт. Тидын нерген Наталия Валерьевна ончылгоч пален, садлан тушто илыше пырыс-влаклан кочкышым намиен. Тылеч посна мийыше еш-влак ты приютышто арулыкым ыштен коденыт.