Медведево посёлкышто верланыше 3-шо номеран колонийыште пластик портфельым ышташ тӱҥалыныт.
Колонийыш пластик портфельын ямде выкройкыжым кондат. Тушто тодылмо верым посна линий дене палемдыме.
Умбакыже кид дене пашам ыштыман: кажне выкройкыш кылым да замокым пижыктыман. Умбакыже технике – ультразвуковой сварке станок – пашам ышта. Уло производствылан тыгай станок икте гына. Технике ужаш-влакым ваш пижыктылеш. Вара веле арвер кӱлеш форман лиеш. Мучашлан логотип-влакым пижыктат да вӱдылкаш оптат.
– Йошкар-Оласе ик предприятий мемнан дене кылым кучаш келшен, но садак кокытеланымашыже лийын. А сатуна сай качестван, тудым жапыштыже ыштена, тиддене ӱшанжым суленна. Кызыт сатум эше шукырак ямдылена. Ӱшанена, тиде производствылан йодмаш лиеш, да йӧн лийме семын эше икмыняр паша верым ыштен кертына, – ойлыш колоний вуйлатышын алмаштышыже Николай Шабалин.
Портфельым ямдылыме участке тений шошым пашам ышташ тӱҥалын. Тиде жапыште 8000 портфельым заказ почеш ыштеныт. План почеш производствын тылзаш объёмжо – 30000 портфель. Кӱлеш годым кок пачаш кугемдашат лиеш.
Тыште пашам ышташ кумыланвлак ятырын улыт. Пашадар ситыше.