Айдеме тунам пиалан, кунам тудо эрдене пашашке куанен вашка, а кастене тыгак мӧҥгыжӧ ошкылеш. Пашаштыжат чыла сай, суртыштыжат ешыже вуча. Лач тыгаяк Марий Элын калык артисткыже Светлана Осипова.
Ӱмыр мучко мурызо лияш! Манаш веле. Тынар шуко артист коклаште шке верым муаш да йомдараш огыл, репертуарым пойдараш, тӱрлӧ концертым эртараш (поро кумылым ончыктышо концертше гына визыт чумырген). Чылажат куштылгын огеш пуалт. Тыштыжат шке сомылым чот йӧратыме да пашаште профессионал улмо, опыт сайынак полшат.
Мурен-мурен, кӱварым мушкын
Пошкырт вел Калтаса район Качмаш ялын ӱдыржӧ изинекак мураш йӧратен. Радиошто утларакшым татар сем-влак йоҥгеныт, Света нунын почеш мурен коштын. Ачаже конюхлан пашам ыштен. Черлан кӧра тудо 40 ияшак илыш дене чеверласен. Светланалан тунам ныл ий гына лийын, садлан ачажым пешыже огешат шарне. А кум ӱдырым да ик эргым (Света ешыште эн изи) авашт шкетын ончен куштен. Тудо правленийыште техничкылан ыштен, Светаланат тушто чӱчкыдын кӱварым мушкашыже пернен: аважлан полшаш тыршен. Тыгодымак мурым мурен-мурен пашам шуктен. Школыштат пайрем-влак годым ямдылыме концертлаште эре выступатлен.
А вара – Йошкар-Ола, И.Палантай лӱмеш музыкальный училище. Марий Элын сулло артистше Александр Фисенко ӱдырым чын мурызо лияш туныктен. Самырык ӱдыр кумшо курсышто военныйлан марлан лектын, да ик жаплан вес кундемыште иленыт, эрге шочын. Уэш Марий Элыш пӧртылмеке, ик ий Марий самырык театрыште администраторлан тыршен, тунамат артист-влак дене пырля сценыш лектын мурен.
Илыш опыт
Тудын илышыжым композитор Валерий Кульшетов дене палыме лиймаш 180 градуслан вашталтен. Тунам композитор Светлана Васильевам, Виктор Комаровым, Люция Аклинам «Мари» эстраде муро студийыш чумырен. Ик жап гыч Люция ден Викторым Влад Николаев ден Татьяна Умурбаева вашталтеныт. «Валерий Дмитриевич мемнам чын артист лияш туныктен, полшен, кузе мураш кӱлмым умылтарен. Тӱҥжӧ: тудо мыланна ӱшанен. Ме тунам фонограмме почеш мурен огынал. Тыгодымак кажне кечын гаяк концерт дене лектынна. Тиде мыланна кугу школ лийын», – ойла Светлана Осипова.
Тиде группат вара шаланен, но Светлана Марий филармониешак лакемын. Кызыт тыште «Марий кундем» калык семӱзгар кугыжаныш ансамбльын солисткыжлан пашам ышта.
«Джимми, Джимми» да молат
Светланан муро репертуарже тӱрлӧ: «Танцор диско» индий фильмысе «Джимми, Джимми» муро гыч тӱҥалын палыме марий композитор-влакын мурышт марте. А икана марий поэт да актёр Василий Регеж-Горохов Наталин репертуарже гыч «Ветер с моря дул» мурым марла муралташ темлен. Тиде почеламутым тудо марлашке кусарен улмаш. Светланалан ты темлымаш келшен шинчын. Ой, тиде мурым кузе йӧратена ыле, кажне дискотекыште тудын почеш куштенна. Шарнеда? Тиддеч вара Светланам эшеат чот палаш тӱҥалыныт.
Кызыт тудо палыме композитор Иван Егоров да поэтессе Зинаида Долгова дене пеҥгыде кылым куча. Нунын келге шонымашан шуко мурышт Светланан репертуаржым пойдарат.
А икмыняр ий ончыч Светлана Осипова поро кумылым ончыктышо концерт-влакым эртараш тӱҥале. Тушто погымо оксам чот черле йоча ден кугыеҥ-влаклан колтымо. Икымше тыгай концерт гыч погымо шийвундым, 200 тӱжем теҥгем, Йошкар-Оласе городской эмлымверын йоча гематологий пӧлкашкыже пуэн. Але марте вич тыгай концертше лийын.
Ныл йоча, кок уныка
Светлана еҥлан полшаш эре ямде. Вет шкенжынат илышыштыже ала-моат лийын: ондалымаш, лишыл еҥын ужалымашыже (предательстве) гочат эрташ пернен. Но оптимист койышыжо да воктенже улшо лишыл йолташыже-влак тудлан эре ончык каяш полшен шогеныт да вийым пуэныт. Да, мутат уке, йӧратыме ешыже – эре пеленже.
Акаже-влак Екатеринбург ден Нефтекамск олаште илат. Нефтекамск оласыже шочмо Качмаш ялыште кугу пӧртым чоҥен шынден. Светланат тушко йочаже-шамыч дене кажне кеҥежым коштеш. Изаже Нижний Тагил олаште верланен. Светан концертше годым чӱчкыдын шӱжарышт пелен улыт.
А мӧҥгыштыжӧ, оласе пачерыштышт, тудым кызыт кок ӱдыржӧ вуча. 15 ияш Мария йылме-влаклан шӱман, англичан йылме дене изинек сайын кутыра. Кызыт япон ден китай йылме-влакым тунемеш. 11 ияш Серафима И.Палантай лӱмеш тӱвыра да сымыктыш колледж пеленысе йоча музыкальный школышто скрипке дене шокта, ятыр конкурсын сеҥышыже. Ӱдыр-влак авашт дене пырля пельменьым, мантым, когыльым ышташ йӧратат.
Кок эрге кушкын шогалыныт, ешан улыт. Женя, школ деч вара Питерысе ик военный вузым тунем лекмеке, Мурманскыште Йӱдвел флотышто служитла. Чӱчкыдын теҥызыш лектеш. Теве лишыл жапыште адак пел ийлан корабльышт теҥызыш тарвана. Аван чон вургыжеш. Женян изи ӱдыржӧ кушкеш. Светланан Максим эргыжат – ешан, тудо аважлан эрге уныкам пӧлеклен. Ешыж дене Йошкар-Олаштак ила, «Согаз» организацийыште пашам ышта.
Илыш шке семынже кая: йоча-влак кушкыт, ме ийготым погена. А муро илаш вийым пуа. Мурызылан гына огыл, тудым колыштшыжланат.
21 ноябрьыште Светлана Осипова «Поро вийлан ӱшанен мый илем» концертше лиеш. 18 шагатлан тӱҥалеш.
Еш альбом гыч налме фото-влак.